मुंबई इंडियन्समध्ये हार्दिकचे भविष्य अधांतरी

Hardik's future in Mumbai Indians मुंबई इंडियन्सचा सध्याचा हंगाम अपेक्षेप्रमाणे न ठरल्याने संघातील नेतृत्व आणि भविष्यासंदर्भात अनेक चर्चा रंगू लागल्या आहेत. स्पर्धेच्या बाद फेरीच्या शर्यतीतून जवळपास बाहेर पडलेल्या मुंबईसमोर आता संघरचनेबाबत मोठे निर्णय घेण्याची वेळ आली आहे. अशा परिस्थितीत कर्णधार हार्दिक पांड्या याच्या भवितव्यावर प्रश्नचिन्ह उपस्थित केले जात असून तो पुढील हंगामात संघात राहणार का, याबाबत अनिश्चितता निर्माण झाली आहे.रोहित शर्मानंतर कर्णधारपदाची जबाबदारी स्वीकारलेल्या हार्दिक पांड्याच्या नेतृत्वाखाली संघाला अपेक्षित यश मिळालेले नाही. मागील हंगामात तसेच चालू स्पर्धेतही संघाची कामगिरी समाधानकारक ठरलेली नाही. पराभवांची मालिका आणि घरच्या मैदानावर झालेल्या सलग अपयशामुळे संघावर टीकेची झोड उठली आहे. दुखापतींमुळे प्रमुख खेळाडूंची अनुपस्थितीही संघाला महागात पडली आहे. काही सामन्यांमध्ये हार्दिक अनुपस्थित राहिल्याने सूर्यकुमार यादवने नेतृत्वाची धुरा सांभाळली आणि रोहित शर्मानेही पुनरागमन करत चांगली फलंदाजी केली.

 

 

 

 

या पार्श्वभूमीवर, हार्दिक पांड्याला कर्णधारपदावरून दूर केले जाऊ शकते, अशी चर्चा जोर धरत आहे. अशी वेळ आल्यास तो संघ बदलण्याचा पर्याय स्वीकारू शकतो, अशी शक्यता व्यक्त केली जात आहे. याच अनुषंगाने कोलकाता नाईट रायडर्स या संघाचे नाव पुढे येत आहे. कोलकाताने काही वर्षांपूर्वी विजेतेपद मिळवले असले तरी त्यानंतर नेतृत्वात सातत्य राहिलेले नाही. सध्याच्या संघरचनेत एक सक्षम अष्टपैलू खेळाडू आणि ठोस नेतृत्वाची गरज भासते आहे. आंद्रे रसेलनंतर त्या भूमिकेत ठसा उमटवणारा खेळाडू संघाला मिळालेला नाही. कॅमेरॉन ग्रीनला संधी देण्यात आली असली तरी तो अपेक्षेप्रमाणे प्रभावी ठरलेला नाही.

 

 

अशा स्थितीत हार्दिक पांड्या हा कोलकातासाठी उपयुक्त पर्याय ठरू शकतो, अशी चर्चा सुरू आहे. फलंदाजी आणि गोलंदाजी या दोन्ही विभागांत तो संघाला बळकटी देऊ शकतो. शिवाय नेतृत्वाचा अनुभव असल्यामुळे संघाला स्थिरता मिळू शकते. मुंबईच्या तुलनेत कोलकाताच्या संघरचनेत त्याच्यावर कमी दबाव राहील, असेही मानले जात आहे. एकूणच, हार्दिक पांड्याच्या भवितव्याबाबत सध्या अनेक शक्यता व्यक्त केल्या जात आहेत. येत्या काळात मुंबई इंडियन्सकडून घेतल्या जाणाऱ्या निर्णयांवर त्याच्या पुढील प्रवासाचे चित्र स्पष्ट होणार आहे.