सेन्सेक्स कोसळला, निफ्टीही घसरला
Total Views |
मुंबई,
Sensex collapsed. गुरुवारी देशांतर्गत शेअर बाजारात सुरुवातीला सकारात्मक वातावरण दिसले, मात्र नंतर व्यवहारात अचानक बदल झाला आणि बाजारावर दबाव निर्माण झाला. परदेशी गुंतवणूकदारांकडून सुरू असलेली विक्री आणि जागतिक घडामोडींमुळे निर्माण झालेली अनिश्चितता याचा थेट परिणाम गुंतवणूकदारांच्या भावनांवर झाला. त्यामुळे दिवसभराच्या व्यवहारानंतर प्रमुख निर्देशांक घसरणीसह बंद झाले. तीस शेअर्सवर आधारित सेन्सेक्स निर्देशांक तब्बल ११४ अंकांनी घसरून सुमारे ७७ हजार ८४४ पातळीवर स्थिरावला. तर राष्ट्रीय शेअर बाजारातील निफ्टी निर्देशांकही किरकोळ घसरणीसह सुमारे २४ हजार ३२६ पातळीवर बंद झाला. याआधीच्या सत्रात दोन्ही निर्देशांकांनी चांगली वाढ नोंदवली होती, मात्र नफावसुलीमुळे त्या तेजीला ब्रेक लागला. सेन्सेक्समधील प्रमुख कंपन्यांमध्ये हिंदुस्तान युनिलिव्हर, टाटा कन्सल्टन्सी सर्व्हिसेस, टेक महिंद्रा, टायटन, सन फार्मा आणि आयटीसी या शेअर्समध्ये घसरण पाहायला मिळाली. दुसरीकडे महिंद्रा अँड महिंद्रा, एनटीपीसी, कोटक महिंद्रा बँक आणि टाटा स्टील या काही कंपन्यांच्या शेअर्समध्ये मात्र थोडी वाढ नोंदवली गेली.