ऑनलाइन रमी प्रकरणात तीन संस्थापकांना अटक

founders arrested in online rummy case ऑनलाइन पैशांच्या खेळांद्वारे आर्थिक गैरव्यवहार केल्याच्या आरोपांप्रकरणी अंमलबजावणी संचालनालयाने मोठी कारवाई केली आहे. प्रसिद्ध गेमिंग कंपनी गेमझक्राफ्ट टेक्नॉलॉजीज लिमिटेडच्या तीन संस्थापक असलेले दीपक सिंग, पृथ्वीराज सिंग आणि विकास तनेजा यांना अटक करण्यात आले आहे. त्यांच्यावर मनी लाँड्रिंगसह अनेक गंभीर आरोप करण्यात आले असून ही कंपनी ‘रमीकल्चर’ आणि ‘रमीटाइम’ या नावाने पैशांवर आधारित ऑनलाइन खेळ चालवत होती.

 

 

 

तपास यंत्रणांच्या माहितीनुसार, विविध राज्यांमध्ये दाखल झालेल्या गुन्ह्यांच्या आधारे ही कारवाई करण्यात आली आहे. या तक्रारींमध्ये ऑनलाइन खेळांच्या माध्यमातून लोकांना मोठ्या नफ्याचे आमिष दाखवून आर्थिक फसवणूक केल्याचा आरोप करण्यात आला आहे. अनेकांनी या खेळांमध्ये मोठी रक्कम गमावल्याची माहिती समोर आली असून काही प्रकरणांमध्ये मानसिक तणाव वाढल्याचाही उल्लेख करण्यात आला आहे. काही राज्यांमध्ये आत्महत्यांशी संबंधित गुन्ह्यांची नोंद झाल्यानंतर तपास अधिक तीव्र करण्यात आला आहे.

 

या प्रकरणाच्या तपासासाठी अंमलबजावणी संचालनालयाने कर्नाटक आणि राष्ट्रीय राजधानी परिसरातील अनेक ठिकाणी एकाचवेळी छापे टाकले. कंपनीची कार्यालये, संबंधित संस्थांची ठिकाणे आणि कर्मचाऱ्यांच्या निवासस्थानी करण्यात आलेल्या या कारवाईत महत्त्वाची कागदपत्रे तसेच डिजिटल स्वरूपातील पुरावे जप्त करण्यात आले आहेत. तपासादरम्यान मिळालेल्या माहितीच्या आधारे कंपनीचे संस्थापक आर्थिक गैरव्यवहारात थेट सहभागी असल्याचा संशय अधिक बळावला आणि त्यानंतर त्यांना अटक करण्यात आली. अधिकाऱ्यांच्या माहितीनुसार, दीपक सिंग आणि पृथ्वीराज सिंग यांना राष्ट्रीय राजधानी परिसरातून ताब्यात घेण्यात आले असून त्यांना पुढील सुनावणीसाठी बंगळूरू येथे नेण्यात येणार आहे. तर विकास तनेजा याला बंगळूरूमधून अटक करून स्थानिक न्यायालयासमोर हजर करण्यात आले. या ऑनलाइन जाळ्यामधून जमा झालेला पैसा नेमका कुठे वापरण्यात आला आणि या व्यवहारांमध्ये आणखी कोणाचा सहभाग होता का, याचा तपास आता अंमलबजावणी संचालनालयाकडून सखोलपणे केला जात आहे.