आकाशात प्रकाशाची झोत आणि जगभर चर्चा! भारताने केली 'अग्नी-६'ची गुपित चाचणी?

agni-6-missile : गुरुवारी ७ मे रोजी सायंकाळच्या सुमारास ओडिशाच्या किनारपट्टीवर एका गूढ आणि तेजस्वी प्रकाशरेषेने सर्वांचे लक्ष वेधून घेतले, ज्यानंतर भारताने 'अग्नी-६' या आपल्या सर्वात शक्तिशाली आंतरखंडीय बॅलेस्टिक क्षेपणास्त्राची (ICBM) चाचणी केल्याच्या चर्चांना उधाण आले आहे. सोशल मीडियासह संरक्षण क्षेत्रातील अभ्यासकांकडून असा दावा केला जात आहे की, भारताने अतिशय गुप्तपणे ही चाचणी पार पाडली असावी. मात्र, या खळबळजनक चर्चेबाबत अद्याप केंद्र सरकार किंवा संरक्षण मंत्रालयाने अधिकृतपणे कोणतीही माहिती दिलेली नाही.

 

 

 

 

 

 

सायंकाळच्या वेळी केवळ ओडिशाच नव्हे, तर पश्चिम बंगाल आणि शेजारील बांगलादेशमधील काही भागांतही आकाशात धुराचे लोट आणि प्रकाशाचा मोठा झोत नागरिकांना पाहायला मिळाला. याचे अनेक व्हिडीओ आणि फोटो इंटरनेटवर व्हायरल झाल्याने ही चर्चा अधिक गडद झाली आहे. अनेक तज्ज्ञांचे असे मत आहे की, हे दृश्य भारताच्या दीर्घ पल्ल्याच्या क्षेपणास्त्र चाचणीचे असू शकते. जर ही चाचणी खरोखरच 'अग्नी-६' ची असेल, तर भारताच्या संरक्षण दलासाठी हा एक ऐतिहासिक टप्पा ठरेल, कारण या क्षेपणास्त्राची मारक क्षमता हजारो किलोमीटरपर्यंत असून ते जगातील कोणत्याही कोपऱ्यात लक्ष्य भेदण्यास सक्षम मानले जाते.

 

असे असले तरी, डीआरडीओ (DRDO) किंवा इतर कोणत्याही सरकारी संस्थेने यावर शिक्कामोर्तब केलेले नाही. अनेकदा अशा महत्त्वाच्या चाचण्यांचे तपशील सुरक्षा कारणास्तव गोपनीय ठेवले जातात. सध्या तरी या कथित चाचणीमुळे सोशल मीडियावर भारतीय संरक्षण शक्तीचे कौतुक होत असून, शत्रू राष्ट्रांच्या मनात या नव्या 'ब्रह्मास्त्रा'ची धडकी भरल्याचे बोलले जात आहे. अधिकृत माहिती समोर आल्यावरच या घटनेमागचे खरे सत्य स्पष्ट होईल, मात्र तोपर्यंत या 'अग्नी-६' च्या कथित चाचणीने जगभरात कुतूहल निर्माण केले आहे.