बंगालमध्ये भाजपचे नवे पर्व...शुभेंदू अधिकारी मुख्यमंत्रीपदी विराजमान
Total Views |
कोलकाता,
Shubhendu Adhikari takes office as Chief Minister पश्चिम बंगालच्या राजकारणात आज ऐतिहासिक बदलाची नोंद झाली. भाजपचे ज्येष्ठ नेते शुभेंदू अधिकारी यांनी राज्याचे नवे मुख्यमंत्री म्हणून शपथ घेत सत्ता हाती घेतली. यासह पश्चिम बंगालमध्ये प्रथमच भाजपचा मुख्यमंत्री विराजमान झाला आहे. राज्यपालांच्या उपस्थितीत कोलकाता येथील ब्रिगेड परेड मैदानावर हा भव्य शपथविधी सोहळा पार पडला. सोहळ्याची सुरुवात राष्ट्रगीताने झाली. त्यानंतर सुवेंदू अधिकारी यांनी मुख्यमंत्रीपदाची शपथ घेतली. शपथविधीपूर्वी त्यांनी पंतप्रधान नरेंद्र मोदी यांच्यासह गुरुदेव रवींद्रनाथ टागोर यांच्या प्रतिमेला पुष्पहार अर्पण करून अभिवादन केले. या कार्यक्रमाला देशातील अनेक दिग्गज नेत्यांची उपस्थिती लाभली होती.
पंतप्रधान नरेंद्र मोदी, उत्तर प्रदेशचे मुख्यमंत्री योगी आदित्यनाथ, महाराष्ट्राचे मुख्यमंत्री देवेंद्र फडणवीस, उपमुख्यमंत्री एकनाथ शिंदे, स्मृती इराणी, शिवराज सिंह चौहान, चिराग पासवान तसेच अभिनेते मिथुन चक्रवर्ती यांच्यासह अनेक मान्यवर या सोहळ्याला उपस्थित होते. भाजपच्या नवनिर्वाचित आमदार रूपा गांगुली यांनी हा दिवस पश्चिम बंगालच्या जनतेसाठी ऐतिहासिक असल्याचे सांगत राज्याच्या विकासासाठी भाजप कटिबद्ध असल्याची प्रतिक्रिया दिली. शपथविधी सोहळ्यात एक भावनिक क्षणही पाहायला मिळाला. पंतप्रधान मोदी यांनी बंगाल भाजपचे ज्येष्ठ कार्यकर्ते माखनलाल सरकार यांची भेट घेत त्यांना आलिंगन दिले आणि त्यांच्या चरणांना स्पर्श करून आशीर्वाद घेतले. या प्रसंगाची मोठी चर्चा रंगली. दरम्यान, भाजपच्या काही नव्या आमदारांनाही मंत्रिमंडळात स्थान मिळण्याची शक्यता व्यक्त करण्यात येत आहे. अग्निमित्र पॉल आणि शंकर घोष यांची नावे चर्चेत आहेत. सुवेंदू अधिकारी यांनी विधानसभा निवडणुकीत माजी मुख्यमंत्री ममता बॅनर्जी यांचा पराभव करत राज्यात मोठा राजकीय बदल घडवून आणला होता. शपथविधीसाठी ममता बॅनर्जी यांनाही निमंत्रण देण्यात आले होते.