स्पर्धेतील वादातून चिराग त्यागीची हत्या?

Chirag Tyagi Murdered Over Competition पॅरा-ॲथलीट चिराग त्यागी यांच्या हत्या प्रकरणाचा तपास जसजसा पुढे सरकत आहे, तसतसे धक्कादायक खुलासे समोर येत आहेत. या प्रकरणात पोलिसांनी पॅरा-ॲथलीट गगन त्यागी याला अटक केली असून त्याने मुख्य आरोपी यश खाटिकला शस्त्र मिळवण्यासाठी मदत केल्याचे तपासात स्पष्ट झाले आहे. शस्त्र पुरवठादाराशी संपर्क जोडण्यातही गगनची भूमिका असल्याचे पोलिसांचे म्हणणे आहे. या प्रकरणातील मुख्य आरोपी यश खाटिक आधीच पोलिसांच्या ताब्यात आहे. तपास अधिकाऱ्यांच्या माहितीनुसार, या हत्येमागे वैयक्तिक राग आणि स्पर्धात्मक वाद असल्याची शक्यता व्यक्त केली जात आहे. काही महिन्यांपूर्वी स्पर्धेदरम्यान यश खाटिकला कागदपत्रांतील त्रुटींमुळे अपात्र ठरवण्यात आले होते आणि यामागे चिराग त्यागी यांची भूमिका असल्याचा संशय त्याच्या मनात निर्माण झाल्याचे समोर आले आहे.

 

 

 

तपासात असेही उघड झाले आहे की, घटनेच्या काही दिवस आधी यशने चिरागवर आर्थिक व्यवहारांबाबत संशय व्यक्त केला होता. चिराग त्यागी आपल्या बँक खात्याशी संबंधित काही व्यवहारांसाठी यशची मदत घेत असल्याचेही समोर आले आहे. हत्येनंतर आरोपीने चिरागच्या खात्यातून रक्कम काढल्याची माहितीही पोलिस तपासात मिळाली असून या प्रकरणाचा आर्थिक पैलूही तपासला जात आहे.पोलिसांच्या चौकशीत यशने घटनाक्रमाची कबुली दिली असून त्याने चिरागला वेगवेगळ्या ठिकाणी नेऊन शेवटी गाझियाबादमधील साई उपवन परिसरात नेल्याचे सांगितले आहे. तेथेच त्याच्यावर गोळीबार करण्यात आल्याचा आरोप आहे. चिरागच्या मृत्यूनंतर शवविच्छेदनातही शरीरात गोळ्या असल्याचे स्पष्ट झाले. या गुन्ह्यासाठी वापरण्यात आलेले शस्त्र काही दिवसांपूर्वीच मिळवण्यात आले होते, अशी माहिती तपासात समोर आली आहे. या प्रकरणात इतर व्यक्तींचाही सहभाग असण्याची शक्यता वर्तवली जात असून पोलिसांकडून अधिक तपास सुरू आहे. या घटनेमुळे क्रीडा क्षेत्रात मोठी खळबळ उडाली आहे.