आरसीबीच्या विजयाचा जल्लोष बेकाबू

Stone-pelting on a bus in Kurnool आयपीएलच्या अंतिम सामन्यात रॉयल चॅलेंजर्स बंगळुरूने ऐतिहासिक विजय मिळवल्यानंतर देशभरातील चाहत्यांमध्ये उत्साहाचे वातावरण निर्माण झाले. सोशल मीडियापासून ते रस्त्यांपर्यंत आरसीबी समर्थकांनी विविध प्रकारे आनंदोत्सव साजरा केला. मात्र, या जल्लोषाला काही ठिकाणी गालबोट लागल्याचे चित्र समोर आले आहे.आंध्र प्रदेशातील कुर्नूल जिल्ह्यात विजयाच्या आनंदात काही चाहत्यांचा उत्साह नियंत्रणाबाहेर गेल्याने गोंधळाची परिस्थिती निर्माण झाली. सामना संपताच शेकडो समर्थक रस्त्यावर उतरले आणि घोषणाबाजी करत वाहतुकीला अडथळा निर्माण केला. याच दरम्यान काही जणांनी एका प्रवासी बसवर दगडफेक केल्याने बसचे नुकसान झाले. अचानक झालेल्या या प्रकारामुळे बसमधील प्रवाशांमध्ये भीतीचे वातावरण पसरले.

 

 

 

घटनेची माहिती मिळताच पोलिसांनी तातडीने घटनास्थळी धाव घेत परिस्थिती नियंत्रणात आणण्याचा प्रयत्न केला. जमावाला पांगवण्यासाठी आणि वाहतूक सुरळीत करण्यासाठी पोलिसांना सुमारे तासभर मेहनत घ्यावी लागली. परिस्थिती शांत झाल्यानंतर पोलिसांनी नागरिकांना संयम राखण्याचे आवाहन केले. यावेळी पोलिसांनी स्पष्ट इशारा देत सांगितले की, विजयाचा आनंद साजरा करणे स्वागतार्ह असले तरी सार्वजनिक मालमत्तेची तोडफोड किंवा कायदा-सुव्यवस्थेला बाधा पोहोचवणाऱ्या व्यक्तींविरुद्ध कठोर कारवाई केली जाईल. तसेच गोंधळात सहभागी झालेल्या संशयितांची ओळख सीसीटीव्ही फुटेजच्या मदतीने पटवून त्यांच्यावर कायदेशीर कारवाई करण्यात येणार असल्याचेही पोलिसांनी सांगितले.