सायरन, क्षेपणास्त्रे आणि हवाई हल्ले!

War Again in the Middle East मध्य पूर्वेतील तणाव आणखी तीव्र झाला असून इराणने सोमवारी पहाटे कुवेतच्या दिशेने क्षेपणास्त्रे आणि ड्रोनचा मारा केल्याने संपूर्ण परिसरात खळबळ उडाली. हल्ल्याच्या पार्श्वभूमीवर देशभरात आपत्कालीन सायरन वाजवण्यात आले, तर नागरिकांनी सुरक्षित ठिकाणी आश्रय घेण्यासाठी धावपळ केली. कुवेतच्या संरक्षण यंत्रणांनी तत्काळ हवाई संरक्षण प्रणाली सक्रिय करून येणारी क्षेपणास्त्रे आणि ड्रोन रोखण्याचा प्रयत्न केला. या घडामोडींनंतर अमेरिकेनेही इराणविरोधात लष्करी कारवाई केल्याची पुष्टी केली आहे. अमेरिकेच्या सेंट्रल कमांडनुसार, इराणकडून वाढलेल्या आक्रमक हालचालींना प्रत्युत्तर म्हणून ही कारवाई करण्यात आली. अमेरिकेने ही मोहीम आत्मसंरक्षणाच्या भूमिकेतून राबविल्याचा दावा केला आहे. यापूर्वी इराणने आंतरराष्ट्रीय सागरी हद्दीत उड्डाण करणारे अमेरिकेचे एक ड्रोन पाडल्याची माहिती समोर आली होती.

 

 

 

 

अमेरिकन लढाऊ विमानांनी इराणमधील हवाई संरक्षण यंत्रणा, नियंत्रण केंद्रे तसेच ड्रोन ऑपरेशनशी संबंधित काही महत्त्वाच्या ठिकाणांना लक्ष्य केले. इराणच्या दक्षिणेकडील भागातील रडार केंद्रे आणि ड्रोन नियंत्रण तळांवरही हल्ले करण्यात आल्याचे सांगितले जात आहे. अमेरिकेच्या मते, ही कारवाई इराणी आक्रमकतेला दिलेले थेट उत्तर आहे.दरम्यान, अमेरिका आणि इराण यांच्यातील शांतता चर्चांना अपेक्षित यश न मिळाल्याने इस्रायलनेही लेबनॉनमधील हिजबुल्लाहच्या तळांवर हल्ल्यांची तीव्रता वाढवली आहे. रविवारी झालेल्या हल्ल्यांमध्ये अनेक इमारतींचे मोठे नुकसान झाल्याचे वृत्त आहे. या वाढत्या संघर्षामुळे संपूर्ण प्रदेशातील सुरक्षा परिस्थिती अधिकच गुंतागुंतीची बनली आहे.

 

 

तणाव कमी करण्यासाठी अमेरिकेचे परराष्ट्र सचिव मार्को रुबियो यांनी इस्रायल आणि लेबनॉनच्या वरिष्ठ नेतृत्वाशी चर्चा केली. दोन्ही देशांदरम्यान संघर्ष टाळण्यासाठी राजनैतिक मार्गाने तोडगा काढण्याचा प्रयत्न सुरू असल्याचे सांगितले जात आहे. अमेरिकेने हिजबुल्लाहने इस्रायलवरील हल्ले थांबवावेत आणि त्याच्या बदल्यात इस्रायलनेही परिस्थिती अधिक चिघळणार नाही याची काळजी घ्यावी, असा प्रस्ताव मांडल्याची माहिती समोर आली आहे. मात्र, या प्रस्तावावर अद्याप एकमत झालेले नसून विविध राजकीय गटांकडून वेगवेगळ्या भूमिका घेतल्या जात आहेत. त्यामुळे मध्य पूर्वेतील परिस्थिती सध्या अत्यंत संवेदनशील बनली असून जगाचे लक्ष या भागातील पुढील घडामोडींवर लागले आहे.