मराठा–ओबीसी तणाव वाढला 'राजकीय वातावरण' तापले

Maratha OBC राज्यात मराठा आरक्षणाच्या मुद्द्यावरून मराठा व ओबीसी समाजातील तणाव पुन्हा एकदा वाढताना दिसत असून, विविध सरकारी निर्णयांमुळे आणि राजकीय वक्तव्यांमुळे सामाजिक दरी अधिक तीव्र होत असल्याचे चित्र निर्माण झाले आहे. मराठा समाजाला ओबीसींसारखे शैक्षणिक लाभ देण्याच्या शासन निर्णयानंतर दोन्ही समाजांमध्ये अस्वस्थता निर्माण झाली असून, या पार्श्वभूमीवर बीड आणि मराठवाड्यातील अनेक भागांत राजकीय आणि सामाजिक हालचालींना वेग आला आहे.

 

 

राज्य सरकारने मराठा समाजातील पात्र घटकांना शिक्षण क्षेत्रात ओबीसीसारख्या काही सवलती देण्याचा निर्णय घेतल्याने मराठा समाजातील मागण्यांना आंशिक दिलासा मिळाल्याचे मानले जात आहे. मात्र या निर्णयामुळे ओबीसी संघटनांमध्ये तीव्र नाराजी व्यक्त होत असून, ओबीसी आरक्षणावर परिणाम होईल अशी भीती काही नेत्यांकडून व्यक्त करण्यात येत आहे. या मुद्द्यावरून विविध संघटनांनी निषेध आंदोलनेही सुरू केली आहेत.

 

 

दरम्यान, मराठा Maratha OBC आरक्षण आंदोलनाचे नेते मनोज जरांगे पाटील यांच्या मागण्यांनंतर सरकारने घेतलेल्या काही निर्णयांवरूनही राजकीय वाद निर्माण झाला आहे. मुख्यमंत्री देवेंद्र फडणवीस यांनी वारंवार स्पष्ट केले आहे की, सरकारचा हेतू कोणत्याही समाजाचे हक्क कमी करणे नसून, मराठा आणि ओबीसी दोन्ही समाजांच्या हितांचे संतुलन राखणे आवश्यक आहे. मात्र या स्पष्टीकरणांनंतरही दोन्ही समाजांतील संशयाचे वातावरण कायम असल्याचे दिसते.नेते छगन भुजबळ आणि अन्य काही नेत्यांनी मराठा आरक्षणाशी संबंधित निर्णयांवर टीका करत ओबीसी समाजाच्या हक्कांचे संरक्षण करण्याची मागणी केली आहे. तर दुसरीकडे मराठा समाजातील काही संघटनांनी आरक्षणाची अंमलबजावणी अधिक प्रभावी करण्याची मागणी पुन्हा एकदा पुढे केली आहे. यामुळे राजकीय पक्षांवरही दबाव वाढत असून, सत्ताधारी आणि विरोधक दोघेही या मुद्द्यावर सावध भूमिका घेताना दिसत आहेत.बीड आणि मराठवाड्यातील काही भागांत मराठा व ओबीसी कार्यकर्त्यांमध्ये समोरासमोर येण्याच्या घटना घडल्याने कायदा व सुव्यवस्थेच्या दृष्टीने प्रशासन सतर्क झाले आहे. पोलिसांनी दोन्ही बाजूंना शांतता राखण्याचे आवाहन केले असून, कोणत्याही प्रकारचा तणाव वाढू नये यासाठी बंदोबस्त वाढविण्यात आला आहे.