प्रभू राम वादाने राहुल गांधींची डोकेदुखी वाढली

Case filed against Rahul Gandhi काँग्रेस नेते आणि लोकसभा विरोधी पक्षनेते राहुल गांधी यांच्याशी संबंधित प्रभू रामांविषयीच्या कथित वक्तव्य प्रकरणात महत्त्वाची न्यायालयीन घडामोड समोर आली आहे. वाराणसीतील खासदार-आमदार न्यायालयाने यापूर्वी फेटाळण्यात आलेल्या तक्रारीला पुन्हा संधी देत कनिष्ठ न्यायालयाचा आदेश रद्द केला आहे. त्यामुळे हे प्रकरण पुन्हा एकदा कायदेशीर चर्चेच्या केंद्रस्थानी आले आहे.हे प्रकरण राहुल गांधी यांनी परदेशातील एका कार्यक्रमादरम्यान केलेल्या कथित वक्तव्याशी संबंधित आहे. तक्रारदाराच्या मते, त्या भाषणात प्रभू रामांविषयी केलेल्या उल्लेखामुळे हिंदू समाजाच्या धार्मिक भावना दुखावल्या गेल्या. याच आधारावर न्यायालयात तक्रार दाखल करण्यात आली होती.

 

 

 

 

यापूर्वी कनिष्ठ न्यायालयाने हे वक्तव्य भारताबाहेर करण्यात आल्याचा मुद्दा उपस्थित करत तक्रार फेटाळली होती. अशा प्रकारच्या प्रकरणात पुढील कारवाईसाठी केंद्र सरकारची परवानगी आवश्यक असल्याचे कारण देण्यात आले होते. मात्र, या निर्णयाविरोधात पुनर्विलोकन याचिका दाखल करण्यात आली होती.या याचिकेवरील सुनावणीदरम्यान न्यायालयाने महत्त्वपूर्ण निरीक्षण नोंदवले. तक्रारीवर प्राथमिक विचार करण्याच्या टप्प्यावर केंद्र सरकारची पूर्वपरवानगी आवश्यक नसल्याचे न्यायालयाने स्पष्ट केले. तसेच केवळ तांत्रिक कारणांवरून तक्रार फेटाळणे योग्य ठरणार नाही, असे मतही नोंदवण्यात आले. न्यायालयाने आता कनिष्ठ न्यायालयाला संपूर्ण प्रकरणाचा नव्याने विचार करून उपलब्ध तथ्ये आणि कायदेशीर बाबींच्या आधारे निर्णय घेण्याचे निर्देश दिले आहेत. त्यामुळे राहुल गांधी यांच्याविरोधातील तक्रारीवर पुढील सुनावणीचा मार्ग मोकळा झाला असून या प्रकरणातील पुढील घडामोडींवर राजकीय वर्तुळाचे लक्ष लागले आहे.