भारताला नवी शक्ती! 450 किमी वेगाचे कामिकाझे ड्रोन दाखल

kamikaze-drones : भारतीय लष्कर आपल्या क्षमता वाढवण्यासाठी सातत्याने कार्यरत आहे. लष्कर एकेक करून आपल्या ताफ्यात अनेक प्राणघातक शस्त्रांची भर घालत आहे. दरम्यान, भारतीय लष्कराला आणखी एक महत्त्वपूर्ण चालना मिळाली आहे. एसएमपीपीने (SMPP) भारतीय लष्कराला १०० कार्यरत आणि सहा प्रशिक्षण 'पीसकीपर (अग्निवेग)' जेट-आधारित कामिकाझे ड्रोन सुपूर्द केले आहेत. हे ड्रोन वेगाने आणि अचूकतेने शत्रूवर प्राणघातक हल्ले करण्यास सक्षम आहेत. त्यांच्या समावेशामुळे भारतीय लष्कराच्या ड्रोन क्षमतेत लक्षणीय वाढ झाली आहे.

 

 

 

 

 

भारतीय लष्कराच्या मारक क्षमतेला मोठी चालना मिळाली आहे. भारतीय संरक्षण कंपनी एसएमपीपीने लष्कराला १०६ जेट-आधारित 'पीसकीपर (अग्निवेग)' कामिकाझे ड्रोनची सुपूर्दगी पूर्ण केली आहे. यामध्ये १०० कार्यरत ड्रोन आणि सहा प्रशिक्षण प्रणालींचा समावेश आहे.

 

मिळालेल्या माहितीनुसार, पीसकीपर (अग्निवेग) हा १८० किलोमीटरपर्यंत पल्ला गाठणारा, स्वदेशी बनावटीचा ड्रोन आहे. हा कामिकाझे ड्रोन ताशी ४५० किमी पर्यंतच्या वेगाने आणि ५ मीटरपेक्षा कमी सीईपी अचूकतेसह शत्रूच्या लक्ष्यांवर अचूक हल्ले करण्यास सक्षम आहे.

 

अग्निवेग हा एक स्वदेशी टर्बोजेट कामिकाझे ड्रोन आहे, जो शत्रूच्या प्रदेशात १८० किलोमीटर आतपर्यंत अचूक हल्ले करण्यास सक्षम आहे. त्याची अचूकता इतकी जास्त आहे की, चाचण्यांमध्ये त्याचा सीईपी ५ मीटरपेक्षा कमी होता. तसेच, इलेक्ट्रॉनिक जॅमिंग आणि स्पूफिंगसह आधुनिक युद्धाच्या वातावरणातही तो मोहिमा प्रभावीपणे पूर्ण करण्यास सक्षम आहे.