रशियन तेल खरेदीचा सल्ला अमेरिकेचाच होता!

Jaishankar message to Western nations रशियाकडून तेल खरेदी करण्याच्या भारताच्या निर्णयावर पुन्हा एकदा भाष्य करताना परराष्ट्र मंत्री एस. जयशंकर यांनी पाश्चात्त्य देशांच्या भूमिकेवर जोरदार टीका केली. फिनलंड दौऱ्यातील एका कार्यक्रमात बोलताना त्यांनी स्पष्ट शब्दांत सांगितले की, युक्रेन युद्धानंतर जागतिक तेलबाजारातील अस्थिरता रोखण्यासाठी भारताने रशियन तेल खरेदी सुरू ठेवावी, अशी अपेक्षा स्वतः अमेरिकेकडून व्यक्त करण्यात आली होती.युक्रेन संघर्षानंतर रशियावर निर्बंध लादण्यात आल्यानंतर जगभरात ऊर्जा संकट निर्माण झाले होते. अशा परिस्थितीत भारताने आपल्या ऊर्जा सुरक्षेला प्राधान्य देत स्वस्त आणि उपलब्ध पर्याय म्हणून रशियन तेलाची खरेदी सुरू ठेवली. या निर्णयावर अनेक पाश्चात्त्य देशांनी टीका केली होती. मात्र, जयशंकर यांनी या टीकेला उत्तर देताना भारताने केवळ राष्ट्रीय हित आणि बाजारातील परिस्थिती लक्षात घेऊन निर्णय घेतल्याचे सांगितले.

 

 

 

 

ते म्हणाले की, तेल खरेदी करताना भारताने नेहमीच किंमत, उपलब्धता आणि देशाच्या गरजा यांचा विचार केला आहे. त्या काळात युरोपीय देश मध्यपूर्वेतील तेलसाठ्यांकडे वळले होते, त्यामुळे भारताला पर्यायी स्रोत शोधावे लागले. रशिया हा त्या काळात विश्वासार्ह पुरवठादार ठरल्याचेही त्यांनी नमूद केले.परराष्ट्र मंत्र्यांनी अमेरिकेच्या बदलत्या धोरणावरही भाष्य केले. सुरुवातीला रशियन तेल व्यवहारांवर निर्बंध आणि दंडात्मक भूमिका घेतल्यानंतर, परिस्थितीनुसार त्यात शिथिलता आणण्यात आली. त्यामुळे या विषयाकडे केवळ नैतिकतेच्या चष्म्यातून पाहणे योग्य नसल्याचे त्यांनी स्पष्ट केले.

 

 

यावेळी जयशंकर यांनी युरोपीय देशांच्या भूमिकेवरही प्रश्न उपस्थित केले. भारताने कधीही युरोपच्या सुरक्षेला धोका निर्माण केला नाही, मात्र भारताविरोधात वापरल्या जाणाऱ्या काही शस्त्रास्त्रांच्या व्यवहारांबाबत युरोपची भूमिका विरोधाभासी असल्याचे त्यांनी सूचित केले. जागतिक राजकारणात प्रत्येक देश आपले राष्ट्रीय हित जपत निर्णय घेत असतो, असेही त्यांनी नमूद केले. भारताने ऊर्जा सुरक्षेला सर्वोच्च प्राधान्य दिले असून, भविष्यातही राष्ट्रीय हित लक्षात घेऊनच तेल खरेदीचे निर्णय घेतले जातील, असा संदेश या वक्तव्यातून देण्यात आला आहे.