स्वातंत्र्याच्या मागणीने पाकिस्तान संकटात

Pakistan in crisis due to demand for independence पाकिस्तानच्या ताब्यातील काश्मीरमध्ये गेल्या काही दिवसांपासून सुरू असलेल्या आंदोलनाने आता मोठे स्वरूप धारण केल्याचा दावा केला जात आहे. विविध भागांतून हजारो नागरिक रावळकोट येथे एकत्र आले असून त्यांनी पाकिस्तान सरकार आणि लष्कराविरोधात जोरदार निदर्शने केली. आंदोलनादरम्यान स्वातंत्र्याच्या घोषणा देत आंदोलकांनी पाकिस्तानच्या धोरणांविरोधात तीव्र नाराजी व्यक्त केली. माहितीनुसार, रावळकोटमधील एका मोठ्या सभास्थळी हजारो लोक जमले होते. आंदोलनकर्त्यांनी पाकिस्तानपासून तसेच बाह्य हस्तक्षेपापासून मुक्तीची मागणी करत घोषणाबाजी केली. कथितपणे सुरक्षादलांच्या कारवाईत काही आंदोलनकर्त्यांचा मृत्यू झाल्यानंतरही आंदोलक माघार घेण्यास तयार नसल्याचे सांगितले जात आहे. उलट, या घटनेनंतर आंदोलन अधिकच तीव्र झाले असून रात्री उशिरापर्यंत निदर्शने सुरू राहिली.

 

 

 

 

या आंदोलनाचे नेतृत्व करणाऱ्या अवामी ॲक्शन कमिटीने अनेक राजकीय आणि घटनात्मक मागण्या पुढे केल्या आहेत. संघटनेच्या मते, स्थानिक लोकप्रतिनिधींनी पाकिस्तानशी निष्ठा व्यक्त करणाऱ्या विद्यमान शपथेऐवजी जम्मू-काश्मीरच्या प्रादेशिक अखंडतेशी निष्ठा राखण्याची शपथ घ्यावी. तसेच विद्यमान राजकीय व्यवस्थेतील काही विशेष जागा रद्द करून नव्या जनगणनेच्या आधारे मतदारसंघांची पुनर्रचना करण्याची मागणीही करण्यात आली आहे.याशिवाय, नवीन मतदार यादी तयार करणे, विस्थापित काश्मिरी नागरिकांना डिजिटल मतदानाचा अधिकार देणे आणि राजकीय नेत्यांना मिळणारे विशेष अधिकार कमी करणे अशा मागण्यांचाही समावेश आहे. आंदोलनकर्त्यांचा आरोप आहे की, सध्याच्या व्यवस्थेमुळे स्थानिक लोकांच्या इच्छेपेक्षा बाह्य हस्तक्षेपाला अधिक वाव मिळतो.

 

दरम्यान, या आंदोलनामुळे परिसरात तणावपूर्ण वातावरण निर्माण झाले आहे. आंदोलने रोखण्यासाठी प्रशासनाने काही प्रमुख आंदोलन नेत्यांविरोधात कठोर कारवाई सुरू केली असून त्यांच्यावर देशद्रोह आणि हिंसाचार भडकवल्याचे आरोप लावण्यात आल्याचे वृत्त आहे. तसेच आंदोलनाचे नेतृत्व करणाऱ्या संघटनेवरही गंभीर आरोप करण्यात आले आहेत.या घडामोडींमुळे पाकिस्तानव्याप्त काश्मीरमधील राजकीय परिस्थिती अधिकच चिघळली असून आंदोलनकर्ते आणि प्रशासन यांच्यातील संघर्ष अद्याप कायम आहे.