'स्वप्नांना मिळणार पंख'

Dharmendra Pradhan आत्मनिर्भर महिला सन्मान कार्यक्रमात महिलांच्या प्रेरणादायी यशोगाथा ऐकताना केंद्रीय शिक्षणमंत्री धर्मेंद्र प्रधान भावूक झाले. भोपाळ येथे आयोजित या कार्यक्रमात त्यांनी विविध क्षेत्रांत उल्लेखनीय कामगिरी करणाऱ्या महिलांशी संवाद साधत त्यांच्या कष्ट, कौशल्य, आत्मविश्वास आणि नवोपक्रमशीलतेचे कौतुक केले. देशातील नारीशक्ती स्वतःच्या पायावर उभी राहत नवी ओळख निर्माण करत असल्याचे गौरवोद्गार त्यांनी यावेळी काढले.

 

 

कार्यक्रमादरम्यान धर्मेंद्र प्रधान यांनी महिलांनी तयार केलेल्या विविध उत्पादनांची पाहणी केली आणि त्यांच्या व्यवसायवृद्धीच्या प्रवासाची माहिती घेतली. शून्यातून स्वतःचे विश्व उभे करणाऱ्या या महिलांसाठी शिक्षण आणि कौशल्यविकासाच्या अधिक संधी उपलब्ध करून देण्याचा महत्त्वपूर्ण निर्णय त्यांनी जाहीर केला. या पुढाकारामुळे देशभरातील महिलांना उच्च शिक्षण आणि कौशल्यविकासासाठी नवे व्यासपीठ उपलब्ध होणार असल्याचे त्यांनी सांगितले.

पंतप्रधान नरेंद्र मोदी यांच्या नेतृत्वाखाली देशातील महिला सर्वच क्षेत्रांत आत्मनिर्भर होत असल्याचे नमूद करत प्रधान यांनी महिला सक्षमीकरणासाठी केंद्र सरकार कटिबद्ध असल्याचे स्पष्ट केले. महिलांना सक्षम, स्वावलंबी आणि आर्थिकदृष्ट्या सबळ बनविण्यासाठी विविध योजना राबविण्यात येत असल्याचे ते म्हणाले. ‘लखपती दीदी’ योजनेचा उल्लेख करत त्यांनी महिला स्वयंरोजगाराबरोबरच शिक्षण, कौशल्यविकास आणि स्टार्टअप क्षेत्रातही महिलांचा सहभाग वाढत असल्याचा विश्वास व्यक्त केला.

 

 

उच्च शिक्षणात नवीन ओळख Dharmendra Pradhan  निर्माण करणाऱ्या महिलांचा गौरव करताना त्यांनी पीएचडी आणि डबल आयटीआयसारख्या उपक्रमांमध्ये उत्साहाने सहभागी झालेल्या महिलांचे विशेष अभिनंदन केले. निर्माल्याचा पुनर्वापर करून त्यापासून विविध उत्पादने तयार करणाऱ्या महिलांच्या उपक्रमाचेही त्यांनी कौतुक केले. अशा उपक्रमांमुळे मंदिर परिसरात स्वच्छता राखली जाते तसेच अनेकांना रोजगाराच्या संधी उपलब्ध होतात, असे त्यांनी सांगितले.यावेळी केंद्र सरकारच्या गोवर्धन आणि लखपती दीदी योजनेची माहिती देताना महिलांच्या आर्थिक प्रगतीसाठी या योजनांचे महत्त्व त्यांनी अधोरेखित केले. आत्मनिर्भर आणि कर्तृत्ववान महिलांसाठी शिक्षणाच्या नव्या संधी उपलब्ध करून देण्यासाठी इंदिरा गांधी राष्ट्रीय मुक्त विद्यापीठ (IGNOU) यांच्या सहकार्याने विशेष अभ्यासक्रम आणि उपक्रम सुरू करण्यात येणार असल्याची घोषणा त्यांनी केली. तसेच भारतीय व्यवस्थापन संस्थांसारख्या (IIM) प्रतिष्ठित संस्थांनाही या उपक्रमाशी जोडण्याचा प्रयत्न करण्यात येईल, असे त्यांनी सांगितले.या उपक्रमामुळे महिलांना केवळ आर्थिकदृष्ट्या सक्षम होता येणार नाही, तर त्यांच्या कौशल्यांना राष्ट्रीय स्तरावर मान्यता मिळून अधिक व्यापक संधीही उपलब्ध होतील, असा विश्वास प्रधान यांनी व्यक्त केला.

भोपाळ शहराला अधिक स्वच्छ, सुंदर आणि आत्मनिर्भर बनविण्यात नारीशक्तीची भूमिका अत्यंत महत्त्वाची असल्याचे सांगत त्यांनी पर्यावरणपूरक जीवनशैलीचा पुरस्कार केला. आगामी काळात पाइप्ड नॅचरल गॅस (PNG) वापराला प्रोत्साहन देण्याची गरज व्यक्त करत ऊर्जा संवर्धन, पर्यावरण संरक्षण आणि शाश्वत विकासासाठी सर्वांनी पुढाकार घेण्याचे आवाहनही त्यांनी केले.