'लव्ह, लॅपटॉप आणि लीक' पत्नीचे खाजगी व्हिडीओ व्हायरल

Bihar cyber crime बिहार मधील कटिहार जिल्हा येथे सोशल मीडियाचा गैरवापर करून पत्नीची बदनामी केल्याचा धक्कादायक प्रकार उघडकीस आला आहे. संशय, राग आणि सोशल मीडियावर प्रसिद्धी मिळवण्याच्या हावेतून एका व्यक्तीने स्वतःच्या पत्नीचे खाजगी फोटो आणि व्हिडीओ ऑनलाइन शेअर केल्याचा आरोप असून या प्रकरणात सायबर पोलिसांनी आरोपीला अटक केली आहे.

 

 

मिळालेल्या माहितीनुसार, संबंधित जोडप्याचे लग्न २०२३ मध्ये झाले होते. सुरुवातीपासूनच पतीला पत्नीच्या वागणुकीबाबत सतत संशय येत असल्याचे कुटुंबीयांचे म्हणणे आहे. पत्नी माहेरी गेली, फोन उशिरा उचलला किंवा नातेवाइकांशी संवाद वाढला तरी त्यातून तो संशय घेत असल्याचे सांगितले जाते. हा संशय कालांतराने वाढत जाऊन वैवाहिक नात्यात तणाव निर्माण झाला.

दोघांमधील मतभेद वाढत गेल्याने पत्नी काही काळ माहेरी राहू लागली. या काळातच आरोपी पतीने पत्नीला बदनाम करण्याच्या हेतूने तिचे खाजगी फोटो आणि व्हिडीओ सोशल मीडियावर अपलोड करण्यास सुरुवात केल्याचा आरोप आहे. या प्रकारामुळे संबंधित महिलेच्या प्रतिष्ठेला आणि गोपनीयतेला गंभीर धक्का बसला.या प्रकरणाची माहिती मिळताच पीडित महिलेने सायबर पोलिसांकडे तक्रार दाखल केली. तक्रार ९ जानेवारी २०२६ रोजी नोंदविण्यात आली होती. त्यानंतर पोलिसांनी डिजिटल पुरावे गोळा करत तपास सुरू केला. Bihar cyber crime आरोपी काही काळ फरार राहिला असला तरी सायबर पोलिसांनी शोधमोहीम राबवत त्याला अखेर अटक केली.या प्रकरणाबाबत सायबर पोलिसांनी सांगितले की, संशय आणि रागातून तसेच सोशल मीडियावर चर्चेत येण्याच्या उद्देशाने हा प्रकार घडल्याचे प्राथमिक तपासात समोर आले आहे. आरोपी सोशल मीडियावर सक्रिय असल्याचेही स्पष्ट झाले आहे.अटकेनंतर चौकशीदरम्यान आरोपीने संबंधित कंटेंट अपलोड केल्याची कबुली दिल्याचे पोलिसांनी सांगितले. पोलिसांनी त्याचा मोबाईल जप्त केला असून त्यामध्ये संबंधित खाजगी फोटो आणि व्हिडीओ आढळून आले आहेत. या डिजिटल पुराव्यांची पुढील फॉरेन्सिक तपासणी सुरू आहे.आशीफ आलम, कटिहार सायबर पोलीस उपअधीक्षक, यांनी स्पष्ट केले की कोणाच्याही खाजगी फोटो किंवा व्हिडीओ परवानगीशिवाय सोशल मीडियावर शेअर करणे हा गंभीर गुन्हा आहे. वैवाहिक नात्यातील व्यक्ती असली तरीही गोपनीयतेचा भंग करण्याचा कोणालाही अधिकार नसल्याचे त्यांनी सांगितले.या घटनेमुळे सोशल मीडियावरील गैरवापर, वैयक्तिक गोपनीयता आणि डिजिटल सुरक्षिततेच्या मुद्द्यावर पुन्हा एकदा गंभीर चर्चा सुरू झाली आहे.