विमानतळाला बॉम्बने उडवून देण्याची धमकी, यंत्रणा अलर्ट मोडवर..

bomb threat देशातील सर्वात व्यस्त आणि महत्त्वाच्या विमानतळांपैकी एक असलेल्या मुंबई आंतरराष्ट्रीय विमानतळाला बॉम्बने उडवून देण्याची धमकी मिळाल्याने सुरक्षा यंत्रणांमध्ये मोठी खळबळ उडाली आहे. अज्ञात व्यक्तीकडून ई-मेलद्वारे ही धमकी देण्यात आली असून, त्यानंतर तात्काळ विमानतळ परिसरात उच्च सतर्कता जाहीर करण्यात आली आहे.

 

 

धमकीचा ई-मेल प्राप्त होताच मुंबई विमानतळ प्रशासनाने पोलिसांना माहिती दिली. त्यानंतर बॉम्ब शोधक व नाशक पथकासह (BDDS) सुरक्षा यंत्रणांनी संपूर्ण विमानतळ परिसराची कसून तपासणी सुरू केली. प्राथमिक तपासणीत कोणतीही संशयास्पद वस्तू आढळून आलेली नाही, अशी माहिती समोर आली आहे. तरीही खबरदारीचा उपाय म्हणून विमानतळ परिसरात सुरक्षा वाढवण्यात आली असून प्रवासी आणि सामान तपासणी अधिक काटेकोर करण्यात येत आहे.

मुंबई आंतरराष्ट्रीय विमानतळावर दररोज हजारो विमानांचे उड्डाण होते तसेच लाखो प्रवाशांची ये-जा सुरू असते. देशाच्या दृष्टीने अत्यंत संवेदनशील आणि महत्त्वाच्या पायाभूत सुविधांमध्ये या विमानतळाचा समावेश असल्याने अशा प्रकारच्या धमकीनंतर सुरक्षा यंत्रणा अधिक सतर्क झाल्या आहेत.यापूर्वीही काही दिवसांपूर्वी मुंबई विमानतळ आणि दक्षिण मुंबईतील ताज हॉटेलला बॉम्बस्फोटाची धमकी देण्यात आली होती. त्या वेळीही ई-मेलद्वारे धमकी देण्यात आली होती आणि नंतर मोठ्या प्रमाणात सुरक्षा वाढवण्यात आली होती. त्यानंतर आता पुन्हा अशाच प्रकारची धमकी मिळाल्याने सुरक्षा यंत्रणांची चिंता वाढली आहे.दरम्यान, दोन दिवसांपूर्वीच मुंबई आणि पुणे शहरांच्या महापौरांना देखील जीवे मारण्याची आणि बॉम्बस्फोट घडवण्याची धमकी देणारे ई-मेल प्राप्त झाले होते. या घटनांमुळे शहरांतील प्रशासकीय आणि सुरक्षा यंत्रणांमध्ये तणावाचे वातावरण निर्माण झाले आहे.या सर्व प्रकरणांची गांभीर्याने दखल घेत पोलिसांनी अज्ञात आरोपीविरोधात अदखलपात्र गुन्हा दाखल केला असून ई-मेलचा स्रोत शोधण्यासाठी तांत्रिक तपास सुरू करण्यात आला आहे. सातत्याने येणाऱ्या धमक्यांच्या पार्श्वभूमीवर सायबर गुन्हे शाखा देखील तपासात सहभागी झाली आहे.

मुंबई विमानतळासारख्या संवेदनशील ठिकाणांवरील सुरक्षेच्या दृष्टीने सर्व यंत्रणा सज्ज असून प्रवाशांच्या सुरक्षिततेसाठी अतिरिक्त उपाययोजना करण्यात आल्या आहेत. सध्या परिस्थिती नियंत्रणात असली तरी तपास यंत्रणा पूर्ण सतर्कतेने पुढील कारवाई करत आहेत.