पोलिसांचा 'वॉच टाइम' आणि ‘गेम ओव्हर’

fake call center raid पुण्यातील हडपसर–फुरसुंगी परिसरात सुरू असलेल्या एका बनावट कॉल सेंटरवर पोलिसांनी केलेल्या कारवाईत मोठ्या प्रमाणावर आर्थिक फसवणुकीचे रॅकेट उघडकीस आले आहे. ऑनलाइन गेमिंग आणि आकर्षक बोनसच्या नावाखाली नागरिकांची फसवणूक केली जात असल्याचे तपासात समोर आले असून या प्रकरणाचे आंतरराष्ट्रीय धागेदोरे दुबईपर्यंत असल्याचा संशय पोलिसांनी व्यक्त केला आहे.

 

 

पोलिसांनी दिलेल्या माहितीनुसार, या कॉल सेंटरवर सुमारे 15 दिवसांपासून गुप्तपणे पाळत ठेवण्यात येत होती. बाहेरून पाहता हा व्यवसाय कायदेशीर स्वरूपाचा वाटत असला तरी आतमध्ये मोठ्या प्रमाणावर फसवणुकीचे जाळे कार्यरत असल्याचे स्पष्ट झाले. त्यानंतर तीन वेगवेगळ्या ठिकाणी छापे टाकून ही कारवाई करण्यात आली.

या कारवाईत दोन जणांना अटक करण्यात आली असून घटनास्थळावरून मोठ्या प्रमाणात रोख रक्कम, सोन्या-चांदीचे दागिने, तसेच संगणक, मोबाईल फोन आणि इतर तांत्रिक साहित्य जप्त करण्यात आले आहे. पोलिसांच्या अंदाजानुसार या रॅकेटद्वारे कोट्यवधी रुपयांचे व्यवहार झाल्याची शक्यता आहे.

 

तपासात असेही समोर आले आहे की, या कॉल सेंटरमधून नागरिकांना फोन करून विविध ऑनलाइन गेमिंग प्लॅटफॉर्मवर नोंदणी करण्यास प्रवृत्त केले जात होते. बोनस, सवलती आणि मोठ्या नफ्याचे आमिष दाखवून लोकांकडून पैसे गुंतवण्यास भाग पाडले जात होते. यामध्ये काही संशयास्पद किंवा भारतात बंदी असलेल्या अ‍ॅप्सचा वापर होत असल्याचा संशयही व्यक्त केला जात आहे.या ठिकाणी fake call center raid सुमारे 120 कर्मचारी कार्यरत असल्याचे आढळून आले असून त्यामध्ये बहुतांश तरुणांचा समावेश आहे. काही अल्पवयीन मुलांचाही या कामात वापर करण्यात येत असल्याची धक्कादायक माहिती समोर आली आहे. हे कर्मचारी दररोज शेकडो नागरिकांना कॉल करून त्यांना गुंतवणुकीस प्रवृत्त करत असल्याचे तपासात निष्पन्न झाले आहे.

कारवाईदरम्यान 18.5 लाख रुपये रोख, सुमारे 690 ग्रॅम सोने आणि 2.5 किलो चांदी जप्त करण्यात आली आहे. यासोबतच 120 हून अधिक संगणक, हार्ड डिस्क आणि इतर इलेक्ट्रॉनिक उपकरणे ताब्यात घेण्यात आली असून या सर्व साहित्याची फॉरेन्सिक तपासणी सुरू करण्यात आली आहे.

 

तपासात आणखी एक गंभीर बाब समोर आली आहे. कर्मचाऱ्यांच्या आधार, पॅन आणि केवायसी कागदपत्रांचा वापर करून मोठ्या प्रमाणात सिमकार्ड खरेदी करण्यात येत होती. हे सिमकार्ड वापरून दररोज शेकडो नागरिकांना कॉल केले जात होते. स्पॅम म्हणून नंबर बंद झाल्यानंतर त्याच कागदपत्रांवर नवीन सिमकार्ड घेतले जात असल्याचेही उघड झाले आहे.

दरम्यान, या संपूर्ण प्रकरणाचे आर्थिक व्यवहार, डेटा चोरी आणि परदेशातील संभाव्य कनेक्शन याचा तपास सध्या सुरू असून या रॅकेटचे जाळे आणखी मोठे असण्याची शक्यता पोलिसांनी वर्तवली आहे.