'टॉप 100' प्रभावशाली खेळाडूंमध्ये स्मृतीची बाजी!
Total Views |
नवी दिल्ली,
smriti-mandhana : भारताची स्टार फलंदाज स्मृती मंधाना सध्या इंग्लंडमध्ये आयसीसी महिला टी-२० विश्वचषक स्पर्धेत सहभागी झाली आहे. भारताने आपल्या सलामीच्या सामन्यात पाकिस्तानचा पराभव केला. या हाय-व्होल्टेज सामन्यात भारताच्या विजयात स्मृती मंधानाने महत्त्वाची भूमिका बजावली. तिने ४४ चेंडूंमध्ये शानदार ६८ धावा केल्या. भारतीय संघ आता १७ जून रोजी नेदरलँड्सविरुद्ध आपला दुसरा सामना खेळणार आहे. या सामन्यापूर्वी स्मृती मंधानाच्या चाहत्यांसाठी एक मोठी बातमी आहे.
स्मृती मंधानाचा समावेश प्रतिष्ठित 'टाइम' मासिकाच्या १०० सर्वात प्रभावशाली खेळाडूंच्या यादीत करण्यात आला आहे. या विशेष यादीत स्थान मिळवणारी ती एकमेव भारतीय खेळाडू आहे. 'टाइम'च्या २०२६ च्या १०० सर्वात प्रभावशाली खेळाडूंच्या यादीत क्रीडा क्षेत्रात महत्त्वपूर्ण योगदान देणारे खेळाडू, प्रशिक्षक आणि गुंतवणूकदारांचा समावेश आहे.
या यादीत अमेरिकन बास्केटबॉल दिग्गज लेब्रॉन जेम्स, तसेच फुटबॉल दिग्गज लिओनेल मेस्सी, चायनीज-अमेरिकन स्कीअर आयलीन गु, टेनिस स्टार कार्लोस अल्काराझ, बास्केटबॉलपटू व्हिक्टर वेंबन्यामा आणि प्रसिद्ध गोल्फर रॉरी मॅकइलरॉय यांचा समावेश आहे. दिग्गज ख्रिस्तियानो रोनाल्डो, दक्षिण आफ्रिकेचा कर्णधार टेंबा बावुमा, न्यूयॉर्क निक्सचा बास्केटबॉलपटू जेलेन ब्रन्सन आणि फिफाचे अध्यक्ष जियानी इन्फँटिनो यांचाही या यादीत समावेश आहे.
२९ वर्षीय मंधाना भारतीय महिला क्रिकेट संघाचा एक महत्त्वाचा भाग आहे आणि तिने अनेक महत्त्वपूर्ण विक्रम प्रस्थापित केले आहेत. 'टाइम'ने मंधानाबद्दल लिहिले आहे की, मुंबईत जन्मलेली ही डावखुरी सलामीवीर फलंदाज देशांतर्गत एकदिवसीय सामन्यात द्विशतक झळकावणारी पहिली भारतीय महिला आहे. ती तिन्ही आंतरराष्ट्रीय फॉरमॅटमध्ये शतके झळकावणारी पहिली महिला आहे. महिला क्रिकेटमध्ये सर्वाधिक आंतरराष्ट्रीय शतके (१७ शतके) करण्याचा संयुक्त विक्रमही तिच्या नावावर आहे. एका कॅलेंडर वर्षात १,००० पेक्षा जास्त एकदिवसीय धावा करणारी ती पहिली महिला क्रिकेटपटू आहे.
TIME मासिकाने मंधानाची प्रशंसा करताना म्हटले आहे की, तिला तिच्या संघाच्या यशाचा सर्वात जास्त अभिमान आहे. तिने रॉयल चॅलेंजर्स बंगळूरला २०२४ आणि २०२६ मध्ये महिला प्रीमियर लीगचे विजेतेपद मिळवून दिले, आणि गेल्या वर्षी आयसीसी महिला विश्वचषक जिंकणाऱ्या भारतीय संघाची ती उपकर्णधार होती, तसेच स्पर्धेत सर्वाधिक धावा करणाऱ्या खेळाडूंमध्ये ती दुसऱ्या क्रमांकावर होती.