गिलचा 'शुभ' शतकी क्षण!

Gill earns a spot among the legends अफगाणिस्तानविरुद्धच्या दुसऱ्या एकदिवसीय सामन्यात भारतीय कर्णधार शुभमन गिलने आपल्या कारकिर्दीतील सर्वोत्कृष्ट खेळींपैकी एक खेळी साकारत अनेक विक्रमांना गवसणी घातली. लखनौच्या एकाना स्टेडियमवर खेळल्या गेलेल्या या सामन्यात गिलने अफगाण गोलंदाजांचा समाचार घेत ११० चेंडूंमध्ये १५४ धावांची झंझावाती खेळी उभारली. या खेळीत त्याने २२ चौकार आणि दोन षटकारांची आतषबाजी केली. केवळ ७७ चेंडूंमध्ये शतक पूर्ण करत त्याने कर्णधार म्हणून पहिलेच एकदिवसीय शतक झळकावले. या खेळीमुळे गिलने भारतीय क्रिकेटमधील अनेक दिग्गजांच्या यादीत आपले स्थान अधिक भक्कम केले. आंतरराष्ट्रीय क्रिकेटमध्ये कर्णधार म्हणून सर्वाधिक शतके करणाऱ्या भारतीय खेळाडूंच्या यादीत त्याने राहुल द्रविडला मागे टाकत आठवे स्थान पटकावले. कर्णधार म्हणून त्याच्या नावावर आता सात शतके जमा झाली आहेत. या यादीत विराट कोहली अव्वल स्थानी असून त्याच्या नावावर ४१ शतके आहेत.

 

 

 

एकदिवसीय क्रिकेटमध्ये भारतीय कर्णधारांच्या सर्वोच्च वैयक्तिक धावसंख्यांच्या यादीतही गिलने आपली नोंद केली. अफगाणिस्तानविरुद्ध केलेल्या १५४ धावांमुळे तो या विशेष यादीत अग्रगण्य खेळाडूंमध्ये पोहोचला. तसेच अफगाणिस्तानविरुद्ध भारतीय कर्णधाराने केलेल्या सर्वात वेगवान शतकांच्या यादीतही त्याने स्थान मिळवले. गिलच्या या खेळीला इशान किशनची तितकीच दमदार साथ लाभली. इशाननेही आक्रमक फलंदाजी करत अवघ्या ७१ चेंडूंमध्ये शतक पूर्ण केले आणि अखेरीस १२५ धावांची शानदार खेळी केली. त्याच्या खेळीत १४ चौकार आणि ७ षटकारांचा समावेश होता. गिल आणि इशान यांनी तिसऱ्या विकेटसाठी तब्बल २२४ धावांची भागीदारी रचत अफगाणिस्तानच्या गोलंदाजांना पूर्णपणे निष्प्रभ केले. भारतीय संघाच्या आगामी स्पर्धांच्या तयारीसाठी ही खेळी महत्त्वाची मानली जात आहे. विशेषतः कर्णधार शुभमन गिलचा फॉर्म आणि इशान किशनची आक्रमकता यामुळे संघ व्यवस्थापनाचा आत्मविश्वास वाढला असून, या दोघांच्या कामगिरीने भारतीय क्रिकेट चाहत्यांमध्ये उत्साहाचे वातावरण निर्माण झाले आहे.