प्रसाद वैद्यकीय प्रतिष्ठानचे वाङ्मय पुरस्कार जाहीर

Prasad Medical Foundation's Literary Awards Announced नांदेडमध्ये प्रसाद वैद्यकीय प्रतिष्ठानतर्फे दिल्या जाणाऱ्या 2024-25 या वर्षीच्या वाङ्मय पुरस्कारांची घोषणा करण्यात आली आहे. प्रतिष्ठानच्या रौप्यमहोत्सवी वर्षानिमित्त यंदा विविध साहित्य क्षेत्रातील मान्यवरांची निवड करण्यात आली असून या पुरस्कारांमुळे साहित्यविश्वात उत्साहाचे वातावरण निर्माण झाले आहे. या वर्षीचा मातुश्री पद्मिनीबाई बन साधना सन्मान ज्येष्ठ पत्रकार, संपादक आणि लेखक गिरीश कुबेर यांना जाहीर करण्यात आला आहे. संपादक असलेल्या कुबेर यांचा साहित्य व पत्रकारितेतील दीर्घकालीन योगदानासाठी हा सन्मान दिला जाणार आहे.

 

 

 

 

सर्वोत्कृष्ट पुस्तकासाठी दिला जाणारा प्रसाद बन वाङ्मय पुरस्कार कवी अजीम नवाज राही यांच्या ‘वळिवाच्या वेळा’ या कवितासंग्रहाला जाहीर झाला आहे. बुलडाणा जिल्ह्यातील साखरखेर्डा येथील राही यांच्या कवितांनी वाचकांचे लक्ष वेधून घेतले आहे.राज्यस्तरीय ग्रंथगौरव पुरस्कारासाठी वसईतील लेखिका संगीता अरबुने यांच्या ‘एकसोबीस हरी पत्ती लौंग आणि मी’ या ललितलेखसंग्रहाची निवड करण्यात आली आहे. त्यांच्या लेखनातील वेगळेपण आणि संवेदनशील मांडणीला हा गौरव प्राप्त झाला आहे.

स्थानिक साहित्यिकांसाठी असलेला ग्रंथगौरव पुरस्कार नांदेडचे डॉ. प्र. दि. जोशी पाटोदेकर यांच्या ‘हे बंध समाजनिष्ठेचे’ या आत्मकथनाला जाहीर झाला आहे. सामाजिक बांधिलकी आणि अनुभवांची मांडणी यामुळे या पुस्तकाची विशेष दखल घेण्यात आली आहे.प्रसाद वैद्यकीय प्रतिष्ठानचे अध्यक्ष डॉ. अच्युत बन, वाङ्मय पुरस्कार समितीचे निमंत्रक डॉ. सुरेश सावंत आणि संयोजक संजीव कुलकर्णी यांनी नांदेड येथे या पुरस्कारांची अधिकृत घोषणा केली. प्रतिष्ठानच्या वाङ्मय पुरस्कारांचे हे 25वे वर्ष असून या निमित्ताने रौप्यमहोत्सवी वर्ष साजरे केले जात आहे. याच सोहळ्यात मागील 25 वर्षांच्या प्रवासाचा आढावा घेणारा विशेष ग्रंथ प्रकाशित केला जाणार असून डॉ. अच्युत बन यांच्या प्रवासवर्णनपर ‘ज्वालामुखींच्या प्रदेशात’ या पुस्तकाचे प्रकाशनही गिरीश कुबेर यांच्या हस्ते होणार आहे.