लाडक्या बहिणी योजनेत पुन्हा दीड लाख महिला अपात्र

Another 1.5 lakh women ineligible. लडकी बहिण योजनेअंतर्गत मे महिन्याचा हप्ता १६ जूनपासून लाभार्थ्यांच्या खात्यात जमा होण्यास सुरुवात झाली असतानाच नाशिक जिल्ह्यात मोठी धक्कादायक बाब समोर आली आहे. प्रशासनाच्या सखोल पडताळणीनंतर सुमारे दीड लाख महिलांना अपात्र घोषित करण्यात आले असून, त्यांच्या खात्यातील आर्थिक लाभ थांबवण्यात आला आहे. प्रशासनाने दिलेल्या माहितीनुसार, या योजनेचा लाभ फक्त शासनाने ठरवलेल्या सर्व पात्रता निकषांची पूर्तता करणाऱ्या महिलांनाच दिला जातो. यासाठी गेल्या काही महिन्यांपासून नाशिक जिल्ह्यात विशेष पडताळणी मोहीम राबवण्यात आली होती. या मोहिमेत ई-केवायसी, कागदपत्रांची तपासणी आणि अर्जातील माहितीची बारकाईने छाननी करण्यात आली.

 

 

 

या तपासणीत मोठ्या प्रमाणावर अर्जदार महिलांच्या कुटुंबांचे वार्षिक उत्पन्न ₹२.५ लाखांच्या मर्यादेपेक्षा अधिक असल्याचे स्पष्ट झाले. योजनेच्या नियमानुसार अशा कुटुंबांना आर्थिक लाभासाठी पात्र मानले जात नाही. याशिवाय अनेक अर्जांमध्ये आवश्यक कागदपत्रे अपूर्ण किंवा गहाळ असल्याचेही निदर्शनास आले.तपासणीदरम्यान आधार कार्ड, रहिवासी प्रमाणपत्र, बँक पासबुक, उत्पन्नाचा दाखला आणि जन्मदाखला यांसारख्या महत्त्वाच्या कागदपत्रांमध्ये त्रुटी आढळल्या. काही अर्जांमध्ये नाव, जन्मतारीख आणि बँक खात्याच्या तपशीलातही विसंगती आढळून आली. त्यामुळे प्रशासनाने अशा अर्जांवर कारवाई करत संबंधित लाभार्थ्यांना अपात्र ठरवले.

 

 

नाशिक जिल्ह्यात योजना सुरू झाल्यापासून अंदाजे १४ ते १५ लाख महिलांनी अर्ज दाखल केले होते. मात्र पडताळणी प्रक्रिया पूर्ण झाल्यानंतर पात्र लाभार्थ्यांची संख्या लक्षणीयरीत्या कमी झाली आहे. या कारवाईमुळे योजनेच्या अंमलबजावणीत पारदर्शकता आणि नियमांचे काटेकोर पालन करण्याचा प्रशासनाचा प्रयत्न स्पष्ट झाला आहे. दरम्यान, या निर्णयामुळे अनेक महिलांमध्ये चिंता निर्माण झाली असून अपात्र ठरलेल्या लाभार्थ्यांकडून पुन्हा पडताळणी किंवा दुरुस्तीची मागणी होण्याची शक्यता आहे. आता प्रशासन पुढे कोणती भूमिका घेते, याकडे सर्वांचे लक्ष लागले आहे.