बाल तस्करीचा भेसूर चेहरा उघड!

नवी दिल्ली रेल्वे स्थानक परिसरातून अपहरण करण्यात आलेल्या एका लहान मुलाची दिल्ली पोलिसांनी यशस्वी सुटका केली असून, या प्रकरणात मोठ्या बाल तस्करी रॅकेटचा पर्दाफाश करण्यात आला आहे. या कारवाईत पोलिसांनी एकूण 8 जणांना अटक केली आहे.

 

 

 

मिळालेल्या माहितीनुसार, काही अज्ञात व्यक्तींनी रेल्वे स्थानक परिसरातून या मुलाचे अपहरण केले होते. घटनेची माहिती मिळताच दिल्ली पोलिसांनी तातडीने तपास सुरू केला आणि विविध पथकांना कामाला लावले. परिसरातील सीसीटीव्ही फुटेज आणि गुप्त माहितीच्या आधारे पोलिसांनी आरोपींचा माग काढला.

 

तपासादरम्यान हे प्रकरण केवळ अपहरणापुरते मर्यादित नसून एका मोठ्या बाल तस्करी रॅकेटशी जोडलेले असल्याचे उघड झाले. या टोळीचे जाळे विविध राज्यांपर्यंत पसरलेले असल्याचेही समोर आले आहे.

 

पोलिसांनी विशेष मोहिम राबवत वेगवेगळ्या ठिकाणी छापे टाकले आणि अपहरण झालेल्या मुलाला सुरक्षितपणे ताब्यात घेतले. त्यानंतर या रॅकेटशी संबंधित आठ जणांना अटक करण्यात आली आहे. यामध्ये टोळीतील मुख्य सदस्य, मध्यस्थ आणि इतर सहकारी यांचा समावेश असल्याचे पोलिसांनी सांगितले.

 

या संपूर्ण प्रकरणाचा पुढील तपास सुरू असून, या बाल तस्करी नेटवर्कमधील इतर सदस्यांचा शोध घेण्यासाठी पोलिसांची कारवाई सुरू आहे.