पावसाच्या बिघडलेल्या समीकरमुळे पुढील 5 महिने निर्णायक

The next 5 months are crucial यंदाचा मान्सून भारतासाठी आव्हानात्मक ठरण्याची चिन्हे दिसू लागली आहेत. जूनच्या सुरुवातीला नैऋत्य मान्सून देशात दाखल झाला असला तरी अनेक भागांमध्ये अपेक्षेपेक्षा कमी पावसाची नोंद झाली आहे. हवामान तज्ज्ञांच्या मते, यामागे ‘एल निनो’ ही महत्त्वाची हवामानविषयक घटना कारणीभूत ठरत आहे. त्यामुळे पुढील काही महिने देशासाठी कठीण जाऊ शकतात, असा इशारा देण्यात आला आहे.‘एल निनो’मुळे प्रशांत महासागरातील पाणी असामान्यपणे गरम होते आणि त्याचा परिणाम जगभरातील हवामानावर होतो. विशेषतः भारताच्या मान्सूनवर त्याचा मोठा प्रभाव पडतो. जेव्हा एल निनो सक्रिय होतो, तेव्हा भारताकडे येणारे बाष्पयुक्त वारे कमकुवत होतात. परिणामी पावसाचे प्रमाण घटते आणि अनेक भागांमध्ये पर्जन्यमान कमी राहते.

 

 

 

 

भारतीय हवामान विभागाने यंदाच्या मान्सूनबाबत सावध अंदाज व्यक्त केला आहे. सरासरीपेक्षा कमी पाऊस पडण्याची शक्यता वर्तवण्यात आली असून काही भागांमध्ये दुष्काळसदृश परिस्थिती निर्माण होण्याची भीती व्यक्त होत आहे. विशेषतः जुलै ते नोव्हेंबर हा कालावधी अधिक महत्त्वाचा मानला जात असून याच काळात एल निनोचा प्रभाव तीव्र होण्याची शक्यता आहे.भारतासाठी मान्सून अत्यंत महत्त्वाचा आहे, कारण देशातील वार्षिक पावसाचा मोठा हिस्सा याच काळात पडतो. शेती, जलसाठे, वीज निर्मिती आणि अर्थव्यवस्था मोठ्या प्रमाणावर पावसावर अवलंबून असते. त्यामुळे पावसात घट झाल्यास त्याचे दूरगामी परिणाम दिसू शकतात. हवामान तज्ज्ञांच्या अंदाजानुसार, जुलै-ऑगस्टमध्ये एल निनोचा प्रभाव आणखी वाढू शकतो आणि सप्टेंबरपर्यंत परिस्थिती अधिक गंभीर होण्याची शक्यता आहे. त्यामुळे यंदाचा मान्सून आणि त्याचा परिणाम याकडे संपूर्ण देशाचे लक्ष लागले आहे.