फक्त 6 WPL सामने…आणि थेट वर्ल्ड कप कॉल!

prem-rawat : आयसीसी महिला टी-२० विश्वचषक स्पर्धेदरम्यान भारतीय संघाला मोठा धक्का बसला आहे. अनुभवी खेळाडू श्रेयंका पाटील दुखापतीमुळे स्पर्धेतून बाहेर पडली आहे. तिच्या जागी नवीन खेळाडूची घोषणाही करण्यात आली असून, नवोदित खेळाडू प्रेमा रावतचा टी-२० विश्वचषक संघात समावेश करण्यात आला आहे. आयसीसीच्या इव्हेंट टेक्निकल कमिटीने पाटीलच्या जागी लेग-स्पिनर प्रेमा रावतच्या भारतीय संघात समावेशास मंजुरी दिली आहे. प्रेमा रावत, जी आधीच 'इंडिया ए' संघाचा भाग म्हणून इंग्लंडमध्ये होती, ती आता स्पर्धेतील उर्वरित सामन्यांसाठी वरिष्ठ संघात सामील होईल.

 

 

 

 

 

 

२४ वर्षीय प्रेमा रावतने अद्याप भारतासाठी आंतरराष्ट्रीय पदार्पण केलेले नाही, परंतु तिने देशांतर्गत सामन्यांमधील आपल्या उत्कृष्ट कामगिरीने सर्वांना प्रभावित केले आहे. इतकेच नाही, तर रॉयल चॅलेंजर्स बंगळूर (RCB) संघाकडून खेळताना तिने महिला प्रीमियर लीगमध्ये (WPL) देखील चांगली कामगिरी केली. तिच्या उत्कृष्ट कामगिरीमुळे, तिची महिला आशिया कप रायझिंग स्टार्स स्पर्धेसाठी निवड झाली, जिथे तिने अपवादात्मक कामगिरी केली. या स्पर्धेत इंडिया 'अ' संघाकडून खेळताना प्रेमाने उत्कृष्ट इकॉनॉमी रेटने ८ बळी घेतले.

 

 

डब्ल्यूपीएलमधील प्रेमा रावतच्या कामगिरीबद्दल बोलायचे झाल्यास, ती आतापर्यंत आरसीबीसाठी ६ सामने खेळली आहे. तिने २०२४-२५ हंगामात ३ सामने आणि २०२५-२६ हंगामात ३ सामने खेळले. एकूण ६ सामन्यांमध्ये तिला केवळ ३ बळी घेता आले आहेत. डब्ल्यूपीएलमध्ये तिची गोलंदाजीची सरासरी २०.३३ आणि इकॉनॉमी रेट १०.१६ होता. टी-२० विश्वचषकासाठी तिला अंतिम ११ खेळाडूंमध्ये संधी मिळते की नाही हे पाहणे उत्सुकतेचे ठरेल.

 

 

आयसीसीने श्रेयंका पाटीलच्या जागी बदली खेळाडूच्या समावेशास मंजुरी देणारे निवेदन जारी केले आहे. त्यांनी सांगितले की, महिला टी-२० विश्वचषक २०२६ समितीने श्रेयंका पाटीलच्या जागी प्रेमा रावतला भारतीय संघात स्थान देण्यास मंजुरी दिली आहे. बुधवारी नेदरलँड्सविरुद्धच्या सामन्यात क्षेत्ररक्षण करताना श्रेयंकाच्या उजव्या घोट्याला दुखापत झाल्याने ती स्पर्धेतून बाहेर पडली आहे. त्यामुळे, तिच्या जागी प्रेमा रावतचा संघात समावेश करण्यात आला आहे.