हृदय ठीक असतानाही २७ रुग्णांची बसवले पेसमेकर!

scam at a government hospital in Kashmir जम्मू-काश्मीरमधील अनंतनाग येथील शासकीय वैद्यकीय महाविद्यालयात समोर आलेल्या कथित पेसमेकर घोटाळ्याने संपूर्ण आरोग्य व्यवस्थेलाच हादरा दिला आहे. सरकारी रुग्णालयांवर विश्वास ठेवून उपचार घेणाऱ्या रुग्णांसाठी ही घटना अत्यंत धक्कादायक मानली जात आहे. हृदयविकार नसतानाही अनेक रुग्णांवर महागडी वैद्यकीय प्रक्रिया करण्यात आल्याचा आरोप समोर आल्याने मोठी खळबळ उडाली आहे.तज्ज्ञ समितीच्या तपासणीत या प्रकरणातील गंभीर अनियमितता उघड झाली. अहवालानुसार, हृदयरोग विभागात एलबीबीएपी (LBBAP) प्रक्रिया करण्यात आलेल्या एकूण ५५ रुग्णांची वैद्यकीय नोंद तपासण्यात आली. त्यापैकी तब्बल २७ रुग्ण, म्हणजे जवळपास ४९ टक्के रुग्णांचे हृदय पूर्णपणे सामान्य असल्याचे निष्पन्न झाले. या रुग्णांना प्रत्यक्षात पेसमेकर किंवा अशा प्रकारच्या उपचारांची कोणतीही गरज नव्हती, असे तपासात स्पष्ट झाले.

 

 

 

 

या प्रकरणानंतर जम्मू-काश्मीरच्या आरोग्य आणि वैद्यकीय शिक्षण विभागाने तातडीने कारवाई सुरू केली आहे. संबंधित हृदयरोग तज्ज्ञ डॉ. सय्यद मकबूल यांच्याविरोधात विभागीय चौकशी सुरू करण्यात आली असून त्यांना कारणे दाखवा नोटीसही बजावण्यात आली आहे. त्यांच्यावर वैद्यकीय प्रक्रियेत अनियमितता, आर्थिक गैरव्यवहार आणि सरकारी आरोग्य योजनांच्या नियमांचे उल्लंघन केल्याचे आरोप आहेत.या प्रकरणामुळे केवळ उपचार पद्धतीवरच नाही, तर सार्वजनिक निधीच्या वापरावरही गंभीर प्रश्न उपस्थित झाले आहेत. विशेषतः प्रधानमंत्री जन आरोग्य योजना अंतर्गत करण्यात आलेल्या महागड्या प्रक्रियांची पारदर्शकता आणि वैधता तपासण्याची मागणी जोर धरू लागली आहे.

 

 

घटना उघड होताच सोशल मीडियावर संतापाची लाट उसळली. अनेकांनी याला रुग्णांच्या विश्वासाचा विश्वासघात म्हटले आहे. श्रीनगर, अनंतनाग आणि काश्मीरमधील इतर भागांतही या मुद्द्यावर तीव्र चर्चा सुरू झाली आहे. सरकारी रुग्णालयांमध्ये उपचारासाठी येणारे रुग्ण डॉक्टरांवर पूर्ण विश्वास ठेवतात. त्यामुळे हे आरोप खरे ठरल्यास, वैद्यकीय क्षेत्रासाठी हा अत्यंत गंभीर धक्का मानला जात आहे. सध्या सर्वांचे लक्ष विभागीय चौकशीच्या अंतिम अहवालाकडे लागले आहे. या तपासातून नेमके कोण जबाबदार ठरणार आणि पुढे कोणती कारवाई होणार, याकडे संपूर्ण देशाचे लक्ष लागले आहे.