पोलार्डचा झटका; गेलच्या १२ वर्षांच्या वर्चस्वाला फटका

t20-cricket-world-record : टी-२० क्रिकेटमधील एक मोठा जागतिक विक्रम मोडला गेला आहे. जवळपास १२ वर्षे या फॉरमॅटमध्ये सर्वाधिक धावा करणाऱ्या ख्रिस गेलला अखेर अव्वल स्थानावरून दुसऱ्या स्थानावर ढकलले गेले आहे. त्याची जागा आता वेस्ट इंडिजच्या शक्तिशाली अष्टपैलू खेळाडूने घेतली आहे. हा शक्तिशाली खेळाडू दुसरा कोणी नसून ३९ वर्षीय पोलार्ड आहे, ज्याने आता टी-२० क्रिकेटमध्ये सर्वाधिक धावा करण्याचा जागतिक विक्रम प्रस्थापित केला आहे.

 

 

 

 

अमेरिकेत खेळल्या जात असलेल्या मेजर लीग क्रिकेट (MLS) २०२६ मध्ये एमआय न्यूयॉर्ककडून खेळताना, पोलार्डने वादळी शतक झळकावून ही ऐतिहासिक कामगिरी केली. डॅलसमध्ये खेळल्या गेलेल्या सामन्यात, त्याने ५६ चेंडूंमध्ये १०० धावा करून ख्रिस गेलचा १४,५६२ धावांचा जागतिक विक्रम मोडला आणि टी-२० क्रिकेटच्या इतिहासातील सर्वाधिक धावा करणारा खेळाडू बनला.

 

 

ख्रिस गेलला दीर्घकाळ टी-२० क्रिकेटमधील सर्वश्रेष्ठ फलंदाज मानले जात होते. २०१४ च्या टी२० विश्वचषकापासून त्याने सातत्याने अव्वल स्थान राखले आहे. त्याचे वर्चस्व एका दशकाहून अधिक काळ टिकले आहे. गेलने टी२० क्रिकेटमध्ये १४,५६२ धावा केल्या आहेत, तर पोलार्डने आता १४,५८२ धावा करून त्याला मागे टाकले आहे. या कामगिरीमुळे पोलार्डने टी२० च्या इतिहासात आपले नाव सुवर्ण अक्षरात कोरले आहे.

 

किरॉन पोलार्ड केवळ एक मोठे फटके मारणारा फलंदाज म्हणून ओळखला जात नाही; तो टी२० क्रिकेटमधील सर्वात यशस्वी अष्टपैलू खेळाडूंपैकी एक आहे. ७३६ टी२० सामने खेळलेला पोलार्ड या फॉरमॅटमधील सर्वाधिक सामने खेळलेला खेळाडू आहे. विशेष म्हणजे, इतर कोणत्याही खेळाडूने ६०० सामन्यांचा टप्पाही गाठलेला नाही. पोलार्डने टी२० क्रिकेटमध्ये १४,००० हून अधिक धावा आणि ३३३ बळी घेतले आहेत. या फॉरमॅटमध्ये १०,००० हून अधिक धावा आणि ३०० हून अधिक बळी घेणारा तो जगातील एकमेव खेळाडू आहे.

 

 

पोलार्डने आपल्या कारकिर्दीत ४०५ झेल घेतले आहेत, जे टी२० क्रिकेटमधील कोणत्याही खेळाडूने घेतलेले सर्वाधिक झेल आहेत. त्याच्या नावावर ९८६ षटकारही आहेत, या बाबतीत तो फक्त ख्रिस गेलच्या मागे आहे. गेलने १०५६ षटकार मारले आहेत. इतकेच नाही, तर पोलार्ड १८ टी२० अंतिम सामने जिंकणाऱ्या संघांचा भाग राहिला आहे, जो स्वतःच एक विक्रम आहे. पोलार्डने टी२० विश्वचषक, आयपीएल, कॅरिबियन प्रीमियर लीग, बांगलादेश प्रीमियर लीग, आयएलटी२० आणि मेजर लीग क्रिकेट यांसारख्या प्रमुख स्पर्धांमध्ये विजेतेपद पटकावले आहे.