सीबीएसई पुनर्मूल्यांकनाचे निकाल जाहीर

cbse-re-evaluation-results : सीबीएसईच्या इयत्ता १२ वीच्या बोर्ड परीक्षेच्या उत्तरपत्रिकांची पडताळणी आणि पुनर्मूल्यांकनासाठी अर्ज केलेल्या विद्यार्थ्यांचे निकाल जाहीर होण्यास सुरुवात झाली असून, नागपूरातील विद्यार्थ्यांसह देशभरातील हजारो विद्यार्थ्यांना मोठा दिलासा मिळाला आहे. रविवारी मंडळाने एकूण प्राप्त अर्जांपैकी ८७ टक्क्यांहून अधिक अर्जांचे निकाल प्रसिद्ध केले.

 

 

 

 

सीबीएसईने 'एक्स'वरील अधिकृत पोस्टद्वारे ही माहिती दिली. उर्वरित अर्जांचे निकालही लवकरच टप्प्याटप्प्याने जाहीर केले जाणार असून, संपूर्ण प्रक्रिया अंतिम टप्प्यात असल्याचे मंडळाने स्पष्ट केले.

 

 

 

नागपूरातील विद्यार्थी त्यांच्या लॉगिन तपशीलांच्या आधारे सीबीएसईच्या अधिकृत संकेतस्थळावर सुधारित गुण आणि अर्जाची सद्यस्थिती तपासू शकतात. उच्च शिक्षणाच्या प्रवेश प्रक्रियेसाठी सुधारित गुणांची प्रतीक्षा करणाऱ्या विद्यार्थ्यांसाठी हा निकाल महत्त्वाचा ठरणार आहे.

 

 

 

काही दिवसांपूर्वी उत्तरपत्रिकांच्या स्कॅन प्रती आणि विद्यार्थ्यांच्या हस्ताक्षरांतील कथित तफावतीमुळे 'ऑन-स्क्रीन मूल्यांकन' प्रणालीवर प्रश्नचिन्ह उपस्थित करण्यात आले होते. या पार्श्वभूमीवर पुनर्मूल्यांकनाच्या निकालांकडे विद्यार्थी आणि पालकांचे विशेष लक्ष लागले होते.

 

 

 

पुनर्मूल्यांकन प्रक्रिया पूर्णपणे पारदर्शक आणि काळजीपूर्वक राबविण्यात आल्याचा दावा सीबीएसईने केला आहे. विद्यार्थ्यांनी सोशल मीडियावरील अप्रमाणित माहितीकडे दुर्लक्ष करून केवळ अधिकृत सूचनांवरच विश्वास ठेवावा, असे मंडळाने स्पष्ट केले आहे. अर्जांबाबत कोणतीही शंका असल्यास सीबीएसई कार्यालयांकडून आवश्यक मार्गदर्शनही उपलब्ध करून दिले जाणार आहे.

 

 

 

पुनर्मूल्यांकन प्रक्रियेदरम्यान 'ऑन-स्क्रीन मूल्यांकन' प्रणालीबाबत निर्माण झालेल्या वादाच्या पार्श्वभूमीवर हे निकाल जाहीर करण्यात आले आहेत. यापूर्वी दिल्ली उच्च न्यायालयाने पुनर्मूल्यांकन पोर्टल पुन्हा सुरू करण्याची मागणी फेटाळून लावत नियोजित प्रक्रियेनुसारच कामकाज सुरू ठेवण्यास मान्यता दिली होती.