20 मिनिटांत तयार झालेलं गाणं ठरलं जागतिक सनसनाटी

Why This Kolaveri Di भारतीय संगीतविश्वात काही गाणी केवळ लोकप्रिय ठरत नाहीत, तर ती एक सांस्कृतिक घटना बनतात. 2011 मध्ये प्रदर्शित झालेले ‘व्हाय धिस कोलावेरी डी’ हे असेच एक गाणे ठरले. तमिळ चित्रपटसृष्टीतील या गाण्याने केवळ दक्षिण भारतातच नव्हे, तर देशभर आणि जगभरातील संगीतप्रेमींना अक्षरशः वेड लावले. आजही हे गाणे भारतीय पॉप-संस्कृतीतील सर्वाधिक चर्चिलेल्या गाण्यांपैकी एक मानले जाते.

 

 

हे गाणे 2012 मध्ये प्रदर्शित झालेल्या ‘3’ या चित्रपटासाठी तयार करण्यात आले होते. चित्रपटात अभिनेता धनुष आणि अभिनेत्री श्रुती हासन यांनी प्रमुख भूमिका साकारल्या होत्या, तर दिग्दर्शनाची धुरा ऐश्वर्या रजनीकांत यांनी सांभाळली होती. विशेष म्हणजे या गाण्याचे बोल स्वतः धनुष यांनी लिहिले आणि ते त्यांनीच गायलेदेखील. संगीतकार अनिरुद्ध रविचंदर यांनी या गाण्याला संगीत दिले होते.‘कोलावेरी डी’च्या निर्मितीशी संबंधित एक रंजक बाब म्हणजे हे गाणे अत्यंत कमी वेळात तयार झाले होते. अनिरुद्ध रविचंदर यांनी अवघ्या 20 मिनिटांत या गाण्याची धून तयार केली, तर धनुष यांनी केवळ सहा मिनिटांत त्याचे बोल लिहिल्याचे सांगितले जाते. साधे शब्द, वेगळी शैली आणि आकर्षक संगीत यामुळे हे गाणे क्षणार्धात लोकांच्या पसंतीस उतरले.

या गाण्याची सर्वात मोठी खासियत म्हणजे त्याची ‘टँग्लिश’ शैली. तमिळ आणि इंग्रजी भाषेतील शब्दांचे अनोखे मिश्रण या गाण्यात पाहायला मिळते. ब्रेकअप झालेल्या एका तरुणाच्या भावनिक अवस्थेचे हलक्याफुलक्या पद्धतीने केलेले चित्रण प्रेक्षकांना भावले. त्यामुळे या गाण्याला ‘सूप सॉन्ग’ म्हणूनही ओळख मिळाली.

नोव्हेंबर 2011 मध्ये गाणे प्रदर्शित झाल्यानंतर सोशल मीडियावर त्याची प्रचंड चर्चा रंगली. ट्विटरवरील #Kolaveri हा हॅशटॅग त्या काळातील सर्वाधिक ट्रेंडिंग विषयांपैकी एक ठरला. यूट्यूबवर अपलोड झालेल्या अधिकृत व्हिडिओला पहिल्याच आठवड्यात 35 लाखांहून अधिक व्ह्यूज मिळाले. त्यानंतर या गाण्याने लोकप्रियतेचे नवे विक्रम प्रस्थापित करत 60 कोटींहून अधिक व्ह्यूजचा टप्पा गाठला.

 

 

‘व्हाय धिस कोलावेरी डी’ची लोकप्रियता Why This Kolaveri Di  भारतापुरती मर्यादित राहिली नाही. अमेरिकेसह अनेक देशांतील रेडिओ स्टेशनवर हे गाणे वाजवले गेले. जागतिक स्तरावर भारतीय संगीताची वेगळी ओळख निर्माण करण्यात या गाण्याचा मोठा वाटा मानला जातो. रिलीज झाल्यानंतरच्या अवघ्या 18 दिवसांत या गाण्याचे सुमारे 41 लाख मोबाईल डाउनलोड्स झाल्याची नोंद आहे.साधे शब्द, हटके संगीत आणि सोशल मीडियाची ताकद यांचा मिलाफ झाल्यास एखादे गाणे किती मोठे यश मिळवू शकते, याचे उत्तम उदाहरण म्हणून ‘व्हाय धिस कोलावेरी डी’कडे आजही पाहिले जाते. एक दशकाहून अधिक काळ लोटल्यानंतरही या गाण्याची लोकप्रियता कायम असून ते भारतीय संगीत इतिहासातील एक मैलाचा दगड मानले जाते.