दादा रामचंद बाखरू सिंधू महाविद्यालयात आंतरराष्ट्रीय योग दिन

dada ramchand bakhru sindhu college आरोग्य, शिस्त आणि एकतेचा संदेश देणारा १२वा आंतरराष्ट्रीय योग दिन दादा रामचंद बाखरू सिंधू महाविद्यालयात उत्साहात साजरा करण्यात आला. महाविद्यालयाच्या शारीरिक शिक्षण विभागातर्फे या कार्यक्रमाचे आयोजन करण्यात आले होते. या उपक्रमात प्राध्यापक, विद्यार्थी तसेच शिक्षकेतर कर्मचारी मोठ्या संख्येने सहभागी झाले. यावेळी डॉ. राखी व्याघ्रा प्रमुख मार्गदर्शक म्हणून उपस्थित होत्या. महाविद्यालयाचे प्राचार्य डॉ. व्ही. एम. पेंडसे यांनी पुष्पगुच्छ देऊन त्यांचे स्वागत केले.

 

 

 

डॉ. व्याघ्रा यांनी आपल्या मार्गदर्शनात योग आणि सामान्य व्यायाम यांतील फरक स्पष्ट केला तसेच विविध योगासनांचे महत्त्व अधोरेखित केले. त्यांनी विविध आसने करून दाखवत ती योग्य पद्धतीने कशी करावीत आणि त्यापासून होणारे आरोग्यदायी फायदे याविषयी सविस्तर माहिती दिली. यानंतर श्वसनाचे विविध व्यायाम घेण्यात आले. डॉ. व्याघ्रा यांनी उपस्थितांकडून ओमकाराचा गुंजारव करून घेतला आणि अनुलोम-विलोम प्राणायामाचे फायदेही समजावून सांगितले. दररोज केवळ ४० मिनिटे योगाभ्यास केल्यास शारीरिक, मानसिक आणि आध्यात्मिक आरोग्य सुधारते तसेच औषधांवरील अवलंबित्व कमी होण्यास मदत होते, असे त्यांनी सांगितले.

 

कार्यक्रमाच्या शेवटी प्राचार्य डॉ. व्ही. एम. पेंडसे यांनी डॉ. व्याघ्रा यांच्या मौल्यवान मार्गदर्शनाबद्दल आभार व्यक्त केले. या कार्यक्रमाला उपप्राचार्य, कुलसचिव, शिक्षक आणि शिक्षकेतर कर्मचारी उपस्थित होते. योग दिनाचा हा उपक्रम सहभागींसाठी प्रेरणादायी ठरला. या माध्यमातून शारीरिक, मानसिक आणि आध्यात्मिक आरोग्याचे महत्त्व अधोरेखित झाले. योगाभ्यासानंतर सर्व सहभागी नव्या उर्जेसह आणि सकारात्मकतेच्या भावनेने परतले.