टेंडर ते पेमेंट...600 कोटींच्या घोटाळ्याची उकल सुरू

health-scam : दिल्ली सरकारच्या आरोग्य विभागाशी संबंधित ६०० कोटी रुपयांच्या आरोग्य घोटाळ्यातील वैद्यकीय उपकरणांच्या खरेदीची चौकशी तीव्र झाली आहे. अंमलबारी संचालनालयाने (ईडी) मनी लाँडरिंगच्या पैलूची चौकशी सुरू केली आहे. ईडीने वैद्यकीय उपकरणे आणि आरोग्यसेवा पुरवठ्याच्या खरेदी प्रक्रियेतील संभाव्य अनियमिततेची चौकशी सुरू केली असून आरोग्य विभागाकडून सविस्तर कागदपत्रे मागवली आहेत.

 

 

 

 

 

 

६०० कोटी रुपयांच्या आरोग्य घोटाळ्यातील चौकशीच्या कक्षेत पोर्टेबल एक्स-रे मशीन, सी-आर्म रेडिओलॉजिकल उपकरणे, ऍनेस्थेशिया वर्कस्टेशन्स, ओरल रिहायड्रेशन सॉल्ट्स (ORS), बेडशीट, लिनन वस्तू, शस्त्रक्रियेचे साहित्य, ड्रेसिंग्ज, टाके, कॅन्युला, हातमोजे आणि औषधे यांच्या खरेदीचा समावेश आहे. वैद्यकीय उपकरणे आणि आरोग्यसेवा पुरवठ्याच्या निविदा, पेमेंट आणि पुरवठ्यासंबंधी संपूर्ण तपशील विभागाकडून मागवण्यात आला आहे.

 

 

ईडीच्या दिल्ली झोन-२ पथकाने दिल्ली सरकारचे आरोग्य सेवा महासंचालक (डीजीएचएस) यांना पत्र पाठवून, केंद्रीय खरेदी एजन्सी (सीपीए) आणि आरोग्य सेवा महासंचालक (डीजीएचएस) यांनी केलेल्या खरेदीशी संबंधित कागदपत्रांची मागणी केली आहे. मनी लाँडरिंग प्रतिबंधक कायद्यांतर्गत सुरू असलेल्या तपासाचा भाग म्हणून ईडीने ही माहिती विभागाकडून मागितली आहे.

 

 

ईडीने निविदा प्रक्रिया, तांत्रिक आणि आर्थिक मूल्यांकन, कंत्राट प्रदान प्रक्रिया, मालाचा पुरवठा, तपासणी, मंजुरी आणि पेमेंट रिलीजशी संबंधित नोंदींचीही मागणी केली आहे. याव्यतिरिक्त, ज्या कंपन्या, उत्पादक, ओईएम (OEMs) आणि वितरकांकडून वैद्यकीय उपकरणे खरेदी केली गेली, त्यांच्याशी संबंधित व्यवहारांची माहितीही ईडीने मागितली आहे. मागितलेल्या कंपन्या आणि उपकरणांच्या नोंदींमध्ये पोर्टेबल एक्स-रे मशीन, सी-आर्म मशीन आणि ऍनेस्थेशिया वर्कस्टेशन्सचे उत्पादन करणाऱ्या कंपन्यांचा समावेश आहे.

 

या प्रकरणाचा तपास सुरू आहे. या संपूर्ण प्रकरणात, वैद्यकीय उपकरणांच्या खरेदी प्रक्रियेत कोणतीही अनियमितता, आर्थिक अनियमितता किंवा मनी लाँडरिंग आहे का, हे शोधण्याचा ईडी प्रयत्न करत आहे.