‘गैरसमज झाला’ म्हणत राहुल गांधी कोर्टात झुकले!
Total Views |
जबलपूर,
rahul-gandhi : मध्य प्रदेशातील जबलपूर उच्च न्यायालयात काँग्रेस नेते राहुल गांधी यांच्यावरील मानहानीच्या खटल्याची सुनावणी होणार आहे. राहुल गांधी यांच्या वतीने उच्च न्यायालयात एक लेखी अर्ज दाखल करण्यात आला आहे. या लेखी अर्जात, काँग्रेस खासदार राहुल गांधी यांनी आपल्या वक्तव्याबद्दल खेद व्यक्त केला आहे. त्यांनी म्हटले आहे की, हे वक्तव्य गैरसमजातून केले गेले होते.
उच्च न्यायालयाचे न्यायाधीश प्रमोद कुमार अग्रवाल यांच्या एकल खंडपीठाने गांधींच्या माफीच्या अर्जावर गुरुवारी सुनावणी निश्चित केली आहे. हा खटला मध्य प्रदेशचे माजी मुख्यमंत्री शिवराज सिंह चौहान यांचे पुत्र कार्तिकेय सिंह चौहान यांनी दाखल केलेल्या मानहानीच्या दाव्याशी संबंधित आहे.
बुधवारी झालेल्या सुनावणीदरम्यान, गांधींनी आपल्या वक्तव्याबद्दल खेद व्यक्त केला. अर्जात म्हटले आहे की, त्यांचे वक्तव्य तक्रारदाराला उद्देशून नव्हते. तक्रारदाराचे प्रतिनिधित्व वकील संकल्प कोचर यांनी केले. या खटल्याची आज पुन्हा सुनावणी होणार आहे.
कार्तिकेय यांनी भोपाळ खासदार-आमदार न्यायालयात गांधी यांच्या विरोधात मानहानीची तक्रार दाखल केली आहे. त्यात त्यांनी आरोप केला आहे की, २०१८ मध्ये झाबुआ येथील एका निवडणूक सभेत राहुल गांधी यांनी पनामा पेपर्स लीकचा उल्लेख करताना अर्जदाराच्या नावाचा कथितरित्या उल्लेख करून त्यांची प्रतिष्ठा मलिन केली.
न्यायालयाने खटल्याची सुनावणी करताना राहुल गांधी यांना वैयक्तिक हजेरीसाठी समन्स बजावले. काँग्रेस नेत्याने मानहानीच्या खटल्याला आणि न्यायालयाने बजावलेल्या समन्सला आव्हान दिले.
न्यायालयाने खटल्याची सुनावणी करताना याचिकाकर्त्याला कनिष्ठ न्यायालयापुढील कागदपत्रे सादर करण्याचे निर्देश दिले. मंगळवारी याचिकेवर सुनावणी झाली आणि याचिकाकर्त्याने कनिष्ठ न्यायालयापुढील कागदपत्रे उच्च न्यायालयासमोर सादर केली. यानंतर, एकल खंडपीठाने बुधवार, २४ जून रोजी याचिकेवर सुनावणी घेण्याचे निर्देश दिले.