रश्मिका मंदानाच्या नॅचरल ब्युटी आणि फिटनेसचं सिक्रेट काय?

Rashmika Mandanna दक्षिण भारतीय चित्रपटसृष्टीतील लोकप्रिय अभिनेत्री रश्मिका मंदाना ही तिच्या अभिनयासोबतच फिटनेस आणि नैसर्गिक सौंदर्यासाठीही ओळखली जाते. एकेकाळी ‘नॅशनल क्रश’ म्हणून ओळख मिळवलेल्या रश्मिकाची तरुणांमध्ये आजही मोठी लोकप्रियता आहे. अभिनेता विजय देवरकोंडासोबतच्या लग्नानंतर तिच्या वैयक्तिक आयुष्याबाबत चाहत्यांची उत्सुकता आणखी वाढली आहे. अशातच तिच्या फिटनेस आणि आहारासंदर्भातील काही सवयी चर्चेत आल्या आहेत.

 

 

वयाच्या तिशीतही रश्मिका अतिशय तंदुरुस्त आणि उत्साही दिसते. मात्र, तिच्या फिटनेसचे रहस्य कोणत्याही कठोर डाएट प्लॅनमध्ये नसून नियमित आणि शिस्तबद्ध दिनचर्येत दडलेले आहे. दिवसाची सुरुवात ती भरपूर पाणी पिऊन करते. सकाळी उठल्यानंतर सुमारे एक लिटर पाणी पिण्याची सवय तिने कायम ठेवली आहे. त्यानंतर शरीरातील विषारी घटक बाहेर टाकण्याच्या उद्देशाने ती अॅपल सायडर व्हिनेगरचे सेवन करते. हा नियम ती दररोज न चुकता पाळते.

आहाराच्या बाबतीतही रश्मिका विशेष काळजी घेते. दक्षिण भारतीय खाद्यपदार्थ तिच्या आवडीचे असले तरी तिने आहारतज्ज्ञांच्या सल्ल्यानुसार काही बदल स्वीकारले आहेत. नियमितपणे भाताचे सेवन करण्याऐवजी ती विविध प्रकारच्या रस्सेदार भाज्या आणि पौष्टिक पदार्थांचा आहारात समावेश करते. त्यामुळे शरीराला आवश्यक पोषक घटक मिळण्यास मदत होते.

वर्कआउटनंतर शरीराला आवश्यक ऊर्जा आणि प्रथिने मिळावीत यासाठी ती प्रोटिनयुक्त पदार्थांना प्राधान्य देते. विशेषतः अंड्यांचा समावेश तिच्या आहारात नियमितपणे असतो. यामुळे स्नायूंची ताकद टिकवून ठेवण्यास आणि शरीराची ऊर्जा वाढविण्यास मदत होते.

रात्रीच्या जेवणात रश्मिका Rashmika Mandanna  हलक्या आणि संतुलित आहाराला पसंती देते. मात्र, मित्र-मैत्रिणींसोबत बाहेर फिरायला गेल्यावर ती खाण्यापिण्याचा मनमुराद आनंद घेत असल्याचे सांगितले जाते. फिटनेससाठी आवश्यक असलेली शिस्त पाळतानाच आयुष्यातील छोट्या आनंदांचाही ती आस्वाद घेते.

विशेष म्हणजे, रश्मिका गोड पदार्थांचीही मोठी चाहती आहे. कठोर डाएटचे बंधन स्वतःवर न घालता ती अधूनमधून आवडीच्या मिठाई आणि गोड पदार्थांचा आस्वाद घेते. त्यामुळे फिटनेस आणि आवडत्या पदार्थांमध्ये समतोल राखण्याचा तिचा दृष्टिकोन अनेकांसाठी प्रेरणादायी ठरत आहे.

शिस्तबद्ध जीवनशैली, नियमित व्यायाम आणि संतुलित आहार या तीन गोष्टींमुळे रश्मिका मंदाना आजही तंदुरुस्तीचा आदर्श मानली जाते. तिच्या या सवयींमुळेच ती केवळ रुपेरी पडद्यावरच नव्हे तर फिटनेसप्रेमींसाठीही प्रेरणेचे केंद्र बनली आहे.