मोहरमच्या वादातून दरभंग्यात रक्तरंजित संघर्ष

Dispute in Darbhanga at Muharram बिहारमधील दरभंगा येथे मोहरमदरम्यान झालेल्या वादाने हिंसक रूप घेतल्याची धक्कादायक घटना समोर आली आहे. शुक्रवारी सकाळी बहादूरपूर पोलीस ठाण्याच्या हद्दीतील उझौल गावात दोन गटांमध्ये झालेल्या वादातून गोळीबार झाला, ज्यामध्ये एक पोलीस अधिकारी गंभीर जखमी झाले. मिळालेल्या माहितीनुसार, मोहरमच्या पार्श्वभूमीवर एका आखाड्यातील ट्यूबलाइट बंद करण्याच्या कारणावरून दोन गटांमध्ये वाद सुरू झाला. सुरुवातीला शाब्दिक वाद झाला, मात्र काही वेळातच परिस्थिती चिघळली आणि त्याचे रूप हिंसक संघर्षात झाले.

 

 

 

या गोंधळादरम्यान उझौल गावातील सुनील साहनी (वय ३०-३१) याने मोहम्मद मोबीन (वय ५०-५१) यांच्यावर गोळीबार केला. गोळी मोबीन यांच्या पोटात लागल्याने ते गंभीर जखमी झाले. त्यांना तातडीने दरभंग्यातील खासगी रुग्णालयात उपचारासाठी दाखल करण्यात आले.मोहम्मद मोबीन हे पाटणा जिल्हा पोलिसात सहायक उपनिरीक्षक (ASI) म्हणून कार्यरत असून मोहरमच्या सुट्टीसाठी ते घरी आले होते.

 

गोळीबारानंतर परिसरात मोठा गोंधळ उडाला. संतप्त जमावाने सुनील साहनीला घेरले आणि झटापट सुरू झाली. याच दरम्यान त्याच्यावर धारदार शस्त्राने हल्ला करण्यात आला. डोक्यावर गंभीर वार झाल्यामुळे सुनील साहनीचा जागीच मृत्यू झाला. या घटनेनंतर परिसरात तणावपूर्ण शांतता असून मोठा पोलीस बंदोबस्त तैनात करण्यात आला आहे. पोलिसांनी संपूर्ण प्रकरणाचा तपास सुरू केला असून परिस्थिती नियंत्रणात असल्याची माहिती प्रशासनाने दिली आहे.