अमेरिका-इराण तणाव पुन्हा पेटला

us iran tensions flare up again अमेरिका आणि इराण यांच्यातील तणाव पुन्हा एकदा तीव्र झाल्याचे चित्र समोर आले आहे. शस्त्रसंधीनंतर शांतता टिकेल अशी अपेक्षा असतानाच दोन्ही देशांमध्ये पुन्हा लष्करी कारवायांचे आरोप-प्रत्यारोप सुरू झाले आहेत, ज्यामुळे पश्चिम आशियातील परिस्थिती अधिकच गंभीर बनली आहे. मिळालेल्या माहितीनुसार, अमेरिकेच्या नौदल आणि हवाई दलाने होरमुझची सामुद्रधुनी परिसरातील काही इराणी लष्करी ठिकाणांवर कारवाई केल्याचा दावा करण्यात आला आहे. ही कारवाई एका तेलवाहू जहाजावर झालेल्या ड्रोन हल्ल्याला प्रत्युत्तर म्हणून करण्यात आल्याचे अमेरिकेकडून सांगितले जात आहे. या घटनेनंतर आंतरराष्ट्रीय पातळीवर मोठी खळबळ उडाली आहे.

 

 

या हल्ल्यानंतर इराणकडूनही जोरदार प्रत्युत्तर देण्यात आल्याचा दावा करण्यात आला आहे. इराणने कुवेत आणि बहरीनमधील अमेरिकी लष्करी तळांना लक्ष्य केल्याची माहिती समोर आली आहे. यामध्ये हवाई तळ आणि नौदलाशी संबंधित ठिकाणांचा समावेश असल्याचे सांगितले जात आहे. या घडामोडींमुळे संपूर्ण प्रदेशात सुरक्षा यंत्रणा सतर्क झाल्या आहेत.

 

कुवेत आणि बहरीन या दोन्ही देशांनी परिस्थितीचे गांभीर्य लक्षात घेऊन हवाई संरक्षण यंत्रणा सक्रिय केल्याची माहिती मिळत आहे. क्षेपणास्त्र आणि ड्रोन हल्ल्याच्या शक्यतेमुळे सुरक्षा व्यवस्था अधिक कडक करण्यात आली आहे. दरम्यान, इराणकडून इशारा देण्यात आला आहे की शस्त्रसंधीचे उल्लंघन सुरू राहिल्यास संपूर्ण शांतता प्रक्रिया धोक्यात येऊ शकते. या घडामोडींमुळे आंतरराष्ट्रीय समुदायात चिंतेचे वातावरण निर्माण झाले असून परिस्थितीवर सर्व देश बारकाईने लक्ष ठेवून आहेत.