इराणचे सर्वोच्च नेते खामेनेईंना अखेरचा निरोप!

A Final Farewell to Khamenei इराणचे सर्वोच्च धार्मिक आणि राजकीय नेते अयातुल्ला अली खामेनेई यांच्या निधनानंतर देशभरात शोककळा पसरली असून, त्यांच्या अंत्यसंस्कारासाठी मोठ्या प्रमाणावर तयारी सुरू करण्यात आली आहे. सरकारने त्यांच्या स्मरणार्थ तीन दिवसांचा शासकीय दुखवटा जाहीर केला असून, सार्वजनिक सहभागासह भव्य अंत्यविधीचे आयोजन करण्यात येणार आहे. खामेनेई यांच्या पार्थिवाला अखेरचा निरोप देण्यासाठी राजधानी तेहरानसह कोम आणि मशहद या महत्त्वाच्या शहरांमध्ये विशेष कार्यक्रम आयोजित करण्यात येणार आहेत. विविध ठिकाणी श्रद्धांजली सभा, सामूहिक प्रार्थना आणि अंत्ययात्रांचे आयोजन करण्यात येत असून, लाखो नागरिक या कार्यक्रमांत सहभागी होण्याची शक्यता व्यक्त केली जात आहे.

 

 

 

तेहरान महानगर प्रशासनाने अंत्यविधीच्या तयारीला अंतिम स्वरूप देण्यास सुरुवात केली आहे. राजधानीतील मुख्य श्रद्धांजली कार्यक्रम तब्बल २४ तास सुरू राहणार असून, हा देशाच्या इतिहासातील सर्वात मोठ्या सार्वजनिक शोकसभांपैकी एक ठरण्याची शक्यता वर्तवली जात आहे. यासाठी वाहतूक, आरोग्य सेवा, सुरक्षा आणि जनसुविधांची विशेष व्यवस्था करण्यात येत आहे. मशहदमध्ये विशेष अंत्ययात्रा काढण्यात येणार असून, कोम येथे धार्मिक नेत्यांच्या उपस्थितीत प्रार्थना सभा होणार आहेत. देशभरातील नागरिकांना श्रद्धांजली वाहता यावी यासाठी अनेक सार्वजनिक स्थळांवर मोठ्या स्क्रीन आणि विशेष व्यवस्था उभारल्या जात आहेत.

 

 

प्रशासनाच्या अंदाजानुसार, लाखो लोक राजधानी तेहरानमध्ये एकत्र येऊ शकतात. त्यामुळे सुरक्षा यंत्रणांवर मोठी जबाबदारी आली असून, गर्दी नियंत्रण आणि कायदा-सुव्यवस्था राखण्यासाठी विशेष नियोजन करण्यात आले आहे. खामेनेई यांच्या निधनामुळे इराणच्या राजकीय आणि धार्मिक क्षेत्रात मोठी पोकळी निर्माण झाल्याची भावना व्यक्त होत असून, त्यांच्या अंत्यसंस्काराकडे संपूर्ण जगाचे लक्ष लागले आहे.