खान सरांचा कोचिंग बाहेरील गोळीबारावर यू-टर्न

Khan Sir Takes a U-Turn पाटणा येथे प्रसिद्ध शिक्षक खान सर यांच्या कोचिंग सेंटरबाहेर घडलेल्या कथित गोळीबाराच्या घटनेने मोठी खळबळ उडाली होती. मात्र अवघ्या काही तासांतच या प्रकरणाला वेगळे वळण मिळाले असून, स्वतः खान सरांनीच आपला प्रारंभिक दावा मागे घेतला आहे.सुरुवातीला खान सरांनी कोचिंग सेंटरबाहेर गोळीबार, तोडफोड आणि एका सुरक्षा रक्षकाला दुखापत झाल्याचा आरोप केला होता. या घटनेमुळे परिसरात तणाव निर्माण झाला होता. मात्र पोलीस ठाण्यात दाखल करण्यात आलेल्या प्राथमिक तक्रारीत गोळीबाराचा कोणताही उल्लेख नसल्याचे समोर आल्यानंतर परिस्थिती अधिक गुंतागुंतीची झाली.

 

 

 

यानंतर सुमारे १२ तासांनी माध्यमांशी बोलताना खान सरांनी आपल्या विधानात बदल करत, त्या वेळी परिस्थिती अत्यंत तणावपूर्ण होती आणि त्यामुळे गैरसमज झाला असू शकतो, असे स्पष्ट केले. त्यांनी सध्या पोलीस संपूर्ण प्रकरणाचा तपास करत असल्याने यावर अधिक भाष्य करणे योग्य ठरणार नाही, असेही सांगितले.दरम्यान, या घटनेच्या पार्श्वभूमीवर मोठ्या संख्येने विद्यार्थी कोचिंग सेंटरबाहेर जमले. परिस्थिती लक्षात घेता आजचे वर्ग रद्द करण्यात आले आहेत. यानंतर विद्यार्थ्यांनी ‘खान सर जिंदाबाद’च्या घोषणा देत आपला पाठिंबा व्यक्त केला. खान सरांनी स्वतः पुढे येऊन विद्यार्थ्यांना शांत राहण्याचे आणि रस्त्यावर गर्दी न करण्याचे आवाहन केले. त्यांनी प्रशासन तपास करत असून दोषींवर कारवाई सुरू असल्याचे सांगत परिस्थिती नियंत्रणात ठेवण्याचे प्रयत्न केले. मात्र काही विद्यार्थी कॅम्पस परिसरातून हटण्यास तयार नसल्याने तणावपूर्ण वातावरण कायम राहिले आहे.