राष्ट्रीय स्तरावर गडचिरोलीच्या प्रतिभेची चमक

lloyds-sports-academy : गडचिरोली जिल्ह्याच्या क्रीडा प्रतिभेने पुन्हा एकदा राष्ट्रीय स्तरावर आपला ठसा उमटवला आहे. लॉयड्स स्पोर्ट्स अकादमी (एलएसए) च्या विद्यार्थ्यांनी गोवा येथे आयोजित करण्यात आलेल्या पहिल्या अखिल भारतीय इनडोअर तिरंदाजी स्पर्धा 2026 मध्ये उल्लेखनीय कामगिरी करत राष्ट्रीय स्तरावर सुवर्ण आणि रौप्य पदकांची कमाई केली.

 

 

 

 

 

 

ही स्पर्धा गोवा अमेच्युअर आर्चरी असोसिएशनतर्फे आयोजित करण्यात आली होती. तसेच तिला आर्चरी असोसिएशन ऑफ इंडिया आणि स्पोर्ट्स अथॉरिटी ऑफ गोवा यांची मान्यता होती. देशातील विविध राज्यांतील प्रतिभावान तिरंदाजांनी या स्पर्धेत सहभाग घेतला होता. विविध वयोगटांमध्ये झालेल्या या स्पर्धेत देशातील आशादायी युवा खेळाडूंमध्ये चुरशीची स्पर्धा पाहायला मिळाली.

 

 

लॉयड्स स्पोर्ट्स अकादमीसाठी अभिमानाची बाब म्हणजे दिया बॅनर्जी हिने अंडर-21 गटात उत्कृष्ट प्रदर्शन करत सुवर्ण पदक पटकावले आणि आपल्या गटातील राष्ट्रीय विजेतेपद मिळविले. अकादमीच्या यशात आणखी भर घालत आदित्य नायगमकर याने अंडर-18 गटात उल्लेखनीय कौशल्य आणि जिद्दीचे प्रदर्शन केले. देशभरातील बलाढ्य प्रतिस्पर्ध्यांविरुद्ध प्रभावी कामगिरी करत त्याने रौप्य पदक जिंकले.

 

 

या दोन्ही तिरंदाजांचे यश त्यांच्या कठोर परिश्रम, शिस्तबद्ध सराव आणि लॉयड्स स्पोर्ट्स अकादमीकडून मिळणार्‍या दर्जेदार प्रशिक्षणाचे प्रतीक आहे. अकादमी सातत्याने परिसरातील क्रीडा प्रतिभेला प्रोत्साहन देत असून युवा खेळाडूंना राष्ट्रीय स्तरावर स्पर्धा करण्याच्या आणि यश संपादन करण्याच्या संधी उपलब्ध करून देत आहे.

 

 

प्रशिक्षक, क्रीडाप्रेमी आणि विविध मान्यवरांनी पदक विजेत्यांचे अभिनंदन करत त्यांच्या या यशाबद्दल गौरव व्यक्त केला. तसेच त्यांच्या या कामगिरीमुळे गडचिरोली आणि आसपासच्या भागातील अनेक युवक-युवतींना क्रीडा क्षेत्रात उत्कृष्टतेसाठी प्रेरणा मिळेल, असा विश्‍वास व्यक्त करण्यात आला.