गुन्हेगारीच्या घटनांमध्ये मोठी वाढ

Supriya Sule विधान परिषद निवडणुकीच्या पार्श्वभूमीवर राष्ट्रवादी काँग्रेस (शरद पवार गट)च्या खासदार सुप्रिया सुळे यांनी काँग्रेस भवनात महाविकास आघाडीच्या नेत्यांसोबत बैठक घेतली. यावेळी पत्रकारांशी संवाद साधताना त्यांनी पुण्यात वाढत्या गुन्हेगारीच्या घटनांवरून राज्य सरकार आणि प्रशासनावर जोरदार टीका केली. पुण्याच्या नागरिकांच्या सुरक्षेचा प्रश्न अत्यंत गंभीर बनला असून याकडे सरकारने तातडीने लक्ष देण्याची गरज असल्याचे त्यांनी म्हटले.

 

 

सुळे म्हणाल्या की, गेल्या काही दिवसांत पुण्यात गुन्हेगारीच्या घटनांमध्ये मोठी वाढ झाल्याचे दिसून येत आहे. हा विषय केवळ राजकारणाचा नसून पुण्यावर प्रेम करणाऱ्या प्रत्येक पुणेकराचा आहे. राजकारण आणि निवडणुका सुरूच राहतील, मात्र शहरातील नागरिकांची सुरक्षा ही सर्वांची सामूहिक जबाबदारी आहे. प्रत्येकाच्या घरात लहान मुले, मुली आणि महिला आहेत. अशा परिस्थितीत वाढत्या गुन्हेगारीविरोधात आवाज उठवणे आवश्यक असल्याचे त्यांनी नमूद केले.

राज्य सरकार, केंद्र Supriya Sule  सरकार आणि स्थानिक प्रशासनाकडून सादर होणाऱ्या गुन्हेगारीच्या आकडेवारीत तफावत असल्याचा आरोपही त्यांनी केला. केंद्रीय गृहमंत्री अमित शहा यांच्या विभागाचा डेटा, महाराष्ट्र सरकारचा डेटा आणि पुणे शहराचा डेटा हे परस्परविरोधी असल्याचे सांगत नेमका खरा डेटा कोणता, हा प्रश्न निर्माण होत असल्याचे त्यांनी म्हटले. शहरात सातत्याने घडणाऱ्या गुन्हेगारीच्या घटना प्रसारमाध्यमांमधून समोर येत असताना त्या पोलिस यंत्रणेला कशा दिसत नाहीत, असा सवालही त्यांनी उपस्थित केला.पुण्यात भ्रष्टाचार, महागाई, बेरोजगारी, पाणीटंचाई आणि कचरा व्यवस्थापन यांसारखे अनेक प्रश्न प्रलंबित असल्याचे सांगत या सर्व मुद्द्यांवर नियमितपणे चर्चा करण्यासाठी दर महिन्याला बैठका घेण्यात येणार असल्याची माहिती त्यांनी दिली.

 

विधान परिषद Supriya Sule  निवडणुकीबाबत विचारलेल्या प्रश्नावर सुळे यांनी स्पष्ट केले की, बैठकीत निवडणुकीसंदर्भात कोणतीही चर्चा झाली नाही. महाविकास आघाडीने एकत्रितपणे निवडणुका लढवण्याचा निर्णय घेतलेला असून बैठकीत मुख्यतः स्थानिक प्रश्नांवर चर्चा करण्यात आली. पुण्यातील वाढती गुन्हेगारी हा सर्वांत महत्त्वाचा विषय असल्याचे त्यांनी अधोरेखित केले.पुणे पोलीस आयुक्तांनी त्यांना पाठविलेल्या पत्राचा उल्लेख करत सुळे म्हणाल्या की, अशा प्रकारची माहिती त्यांना देण्याऐवजी राज्याचे गृहमंत्री देवेंद्र फडणवीस आणि केंद्रीय गृहमंत्री अमित शहा यांच्याकडे पाठविणे अधिक आवश्यक आहे. कोयता गँगच्या हल्ल्यांचे व्हिडीओ सातत्याने समोर येत असताना प्रशासनाने त्याची गंभीर दखल घ्यावी, अशी अपेक्षाही त्यांनी व्यक्त केली. पोलिसांना आवश्यक ते सहकार्य करण्याची भूमिका महाविकास आघाडीची असल्याचे त्यांनी स्पष्ट केले.

 

 

अजित पवार गटाच्या उमेदवारांबाबत उपस्थित झालेल्या करसंबंधित आक्षेपांवर प्रतिक्रिया देताना सुळे यांनी याबाबत अंतिम उत्तर निवडणूक आयोगच देऊ शकतो, असे सांगितले. तसेच इतर पक्षांच्या उमेदवारी आणि अंतर्गत निर्णयांवर भाष्य करणे योग्य नसल्याचेही त्यांनी नमूद केले.पक्षनिष्ठ कार्यकर्त्यांना योग्य संधी मिळायला हवी, असे मत व्यक्त करताना त्यांनी सांगितले की, कोणत्याही पक्षाने आपल्या कार्यकर्त्यांबाबत कोणता निर्णय घ्यायचा हा त्या पक्षाचा अंतर्गत विषय आहे. मात्र पक्षासाठी दीर्घकाळ योगदान देणाऱ्या कार्यकर्त्यांचा सन्मान होणे आवश्यक असल्याचे त्यांनी अधोरेखित केले.पुण्यातील कायदा-सुव्यवस्थेचा प्रश्न, प्रशासनाची भूमिका आणि आगामी निवडणुकांच्या पार्श्वभूमीवर सुप्रिया सुळे यांनी केलेल्या टीकेमुळे राज्यातील राजकीय वातावरण पुन्हा एकदा तापण्याची चिन्हे दिसत आहेत.