राजीनाम्याच्या चर्चांनी तापले इराण!

Iran Resignation Rumors इराणचे राष्ट्राध्यक्ष मसूद पेझेश्कियन यांच्या कथित राजीनाम्याच्या चर्चांनी जोर धरला असतानाच देशाचे सर्वोच्च नेते मोजतबा खामेनेई यांनी राष्ट्रीय एकतेचे महत्त्व अधोरेखित केले आहे. इराणच्या इस्लामिक प्रजासत्ताकाचे संस्थापक रुहोल्लाह खोमेनी यांच्या पुण्यतिथीनिमित्त दिलेल्या संदेशात त्यांनी देशातील नागरिकांना एकजूट राखण्याचे आवाहन केले.खामेनेई यांनी म्हटले की, युद्धभूमीवर अपयशी ठरलेले इराणचे शत्रू आता देशांतर्गत मतभेद निर्माण करून जनतेचा आत्मविश्वास खच्ची करण्याचा प्रयत्न करत आहेत. समाजात निराशा, संशय किंवा असंतोष निर्माण करणारी कोणतीही कृती अप्रत्यक्षपणे शत्रूला मदत करणारी ठरू शकते, असा इशाराही त्यांनी दिला.

 

 

 

 

दरम्यान, राष्ट्राध्यक्ष मसूद पेझेश्कियन यांनी राजीनामा दिल्याच्या बातम्या काही परदेशी माध्यमांमध्ये प्रसिद्ध झाल्यानंतर इराणच्या राष्ट्रपती कार्यालयाने त्या फेटाळून लावल्या आहेत. राष्ट्रपती कार्यालयाचे उपप्रमुख मेहदी तबाताबाई यांनी या वृत्तांना पूर्णपणे खोटे ठरवत कोणत्याही प्रकारचा राजीनामा दिलेला नसल्याचे स्पष्ट केले.सरकारी माहिती परिषदेचे संचालक इलियास हजरती यांनीही सोशल मीडियावरील पोस्टद्वारे पेझेश्कियन देशाच्या कारभारात पूर्ण क्षमतेने कार्यरत असल्याचे सांगितले. काही विदेशी माध्यमे आणि त्यांच्याशी संबंधित घटक देशात निराशा, मतभेद आणि अस्थिरता निर्माण करण्यासाठी अशा अफवा पसरवत असल्याचा आरोप त्यांनी केला. मात्र, इराणी जनतेची एकता आणि सरकारवरील विश्वास डळमळीत करण्याचे प्रयत्न यापूर्वीही अपयशी ठरले असून यावेळीही तसेच होईल, असा दावा त्यांनी केला.

 

राजीनाम्याच्या चर्चांना सुरुवात एका वृत्तामुळे झाली होती. त्या वृत्तानुसार, पेझेश्कियन यांनी सर्वोच्च नेतृत्वाला पाठविलेल्या कथित पत्रात महत्त्वाच्या निर्णयप्रक्रियेत आपल्याला सहभागी करून घेतले जात नसल्याची खंत व्यक्त केली होती. तसेच इस्लामिक रिव्होल्युशनरी गार्ड कॉर्प्स (IRGC) आणि कट्टरपंथी गटांचा सरकारी निर्णयांवर मोठा प्रभाव असल्याने प्रभावीपणे प्रशासन चालविणे कठीण होत असल्याचे त्यांनी नमूद केल्याचा दावा करण्यात आला होता. मात्र या दाव्याला कोणतीही अधिकृत पुष्टी मिळालेली नाही.या पार्श्वभूमीवर इराणमध्ये राजकीय वातावरण तापले असून सरकारकडून सातत्याने अफवांचे खंडन केले जात आहे. देशातील सत्ताकेंद्र आणि जनतेतील विश्वास कायम ठेवण्यावर सध्या इराणी नेतृत्वाचा भर असल्याचे दिसून येत आहे.