कोटमध्ये जेईईच्या विद्यार्थ्याची आत्महत्या

JEE Student Commits Suicide in Kota देशातील कोचिंग हब म्हणून ओळखल्या जाणाऱ्या कोटा शहरात पुन्हा एकदा धक्कादायक घटना घडली आहे. जेईई परीक्षेची तयारी करणाऱ्या १७ वर्षीय विद्यार्थ्याने गळफास घेऊन आत्महत्या केल्याचे समोर आले असून या घटनेमुळे परिसरात हळहळ व्यक्त केली जात आहे. उत्तर प्रदेशातील संत कबीर नगर जिल्ह्यातील रहिवासी असलेला आर्यन ओझा गेल्या तीन वर्षांपासून कोटामध्ये राहून जेईई परीक्षेची तयारी करत होता. तो ओल्ड राजीव गांधी नगर परिसरातील एका पीजीमध्ये वास्तव्यास होता. घटनेच्या दिवशी त्याच्या खोलीत बराच वेळ कोणतीही हालचाल दिसून न आल्याने संशय निर्माण झाला आणि तपासादरम्यान त्याचा मृतदेह गळफास घेतलेल्या अवस्थेत आढळला.

 

 

 

माहिती मिळताच जवाहर नगर पोलिसांनी घटनास्थळी धाव घेतली आणि विद्यार्थ्याला तातडीने रुग्णालयात हलवले. मात्र डॉक्टरांनी तपासून त्याला मृत घोषित केले. त्यानंतर मृतदेह शवविच्छेदनासाठी रुग्णालयाच्या शवागारात ठेवण्यात आला आहे. प्राथमिक तपासात परीक्षेचा ताण आणि मानसिक दबाव यामुळे ही घटना घडल्याचा संशय व्यक्त केला जात आहे. मात्र घटनास्थळी कोणतीही सुसाईड नोट आढळलेली नसल्याने आत्महत्येचे नेमके कारण अद्याप स्पष्ट झालेले नाही.

 

 

पोलिसांनी घटनास्थळी तपास करत पुरावे गोळा केले असून विद्यार्थ्याच्या कुटुंबीयांना माहिती देण्यात आली आहे. कुटुंबीय कोटामध्ये आल्यानंतर पुढील कायदेशीर प्रक्रिया पूर्ण केली जाणार आहे. मित्र आणि सहाध्यायांच्या म्हणण्यानुसार आर्यन अभ्यासात मेहनती होता, मात्र तो कोणत्या मानसिक तणावातून जात होता याची कोणालाही कल्पना नव्हती. सध्या पोलीस या प्रकरणाचा सर्व बाजूंनी तपास करत आहेत. कोटा शहरात वारंवार समोर येणाऱ्या अशा घटनांमुळे स्पर्धात्मक परीक्षांच्या ताणाचा विद्यार्थ्यांच्या मानसिक आरोग्यावर होणारा परिणाम पुन्हा एकदा चर्चेत आला आहे.