सावधान!! गोड भाषेतून हनी'ट्रॅप'

rajkot honeytrap गुजरातच्या राजकोट जिल्ह्यात पोलिसांनी एका मोठ्या हनीट्रॅप रॅकेटचा भंडाफोड करत ११ आरोपींना अटक केली आहे. या टोळीने गोड बोलणं, बनावट प्रेमसंबंध आणि नियोजित सापळ्याच्या माध्यमातून व्यापारी व व्यावसायिकांना लक्ष्य करत लाखो रुपयांची खंडणी उकळल्याचे उघड झाले आहे. या प्रकरणात मुख्य आरोपी प्रियंका उर्फ पिऊ हिचाही समावेश असून तिच्या अटकेनंतर संपूर्ण जाळे समोर आले आहे.

 

 

 

 

तपास यंत्रणांच्या माहितीनुसार, ही टोळी विशेषतः आर्थिकदृष्ट्या सक्षम व्यापारी, कारखानदार आणि मध्यमवर्गीय व्यावसायिकांना लक्ष्य करत होती. सुरुवातीला गुगल सर्च, दुकानांच्या पाट्या आणि सार्वजनिक ठिकाणांमधून मोबाईल क्रमांक मिळवले जात आणि नंतर त्या क्रमांकांवरून संपर्क साधून जाळे विणले जात असे. या संपर्कातून हळूहळू विश्वास निर्माण करून पीडितांना प्रेमाच्या जाळ्यात अडकवण्याचे काम प्रियंका करत असल्याचे तपासात समोर आले आहे.

जामनगरच्या कलावड येथील रहिवासी असलेली प्रियंका व्यावसायिकांशी सातत्याने संवाद साधत असे, गोड शब्दांमधून त्यांचा विश्वास संपादन करत असे आणि नंतर प्रत्यक्ष भेटीचे आमंत्रण देत असे. मात्र, नियोजित भेटीच्या ठिकाणी ती स्वतः उपस्थित राहत नसे. तिच्या ऐवजी दुसऱ्या महिलेला पाठवले जात असे. त्यानंतर ठरलेल्या ठिकाणी पोहोचताच टोळीतील चार ते पाच सदस्य अचानक हजर होऊन पीडिताला घेरत असत.

यानंतर पीडितांना बलात्कारासारख्या गंभीर प्रकरणांमध्ये अडकवण्याची धमकी देण्यात येत असे. सामाजिक बदनामी, कुटुंबाची प्रतिष्ठा आणि व्यवसाय उद्ध्वस्त होण्याची भीती दाखवून मोठ्या रकमेची खंडणी उकळली जात असे. काही प्रकरणांमध्ये मारहाणीचाही वापर करण्यात आल्याची माहिती पोलिसांनी दिली आहे.

पोलिस तपासात असेही समोर आले आहे की, या टोळीने केवळ राजकोटच नव्हे तर मोरबी, जेटपूर, वांकानेर आणि जुनागढ परिसरातील अनेक व्यावसायिकांना लक्ष्य केले आहे. दोन स्वतंत्र गुन्हे दाखल झाल्यानंतर सुरू झालेल्या सखोल तपासात संपूर्ण कट उघड झाला असून आणखी बळी असण्याची शक्यता व्यक्त केली जात आहे.

तांत्रिक पुरावे आणि गुप्त माहितीच्या आधारे पोलिसांनी कारवाई करत टोळीतील प्रमुख सदस्यांना अटक केली असून सर्वांना न्यायालयीन कोठडी सुनावण्यात आली आहे.rajkot honeytrap या प्रकरणात अजून काही व्यक्ती सहभागी असण्याची शक्यता असून त्यांचा शोध सुरू आहे.

दरम्यान, बदनामीच्या भीतीने अनेक पीडित अद्याप पुढे आले नसल्याचे पोलिसांचे म्हणणे आहे. त्यामुळे अशा घटनांचे बळी ठरलेल्या नागरिकांनी पुढे येऊन तक्रार नोंदवावी, असे आवाहन करण्यात आले आहे. तक्रारदारांची ओळख पूर्णपणे गोपनीय ठेवली जाईल, असे आश्वासनही पोलिसांनी दिले आहे. या घटनेमुळे संपूर्ण सौराष्ट्रात खळबळ उडाली आहे.