के. एस. भरतचा आंतरराष्ट्रीय क्रिकेटला अलविदा

K. S. Bharat retires भारतीय क्रिकेट संघाचा यष्टीरक्षक-फलंदाज के. एस. भरतने वयाच्या अवघ्या 32व्या वर्षी आंतरराष्ट्रीय क्रिकेटमधून निवृत्ती जाहीर केली आहे. सोशल मीडियावर भावनिक संदेश शेअर करत त्याने आपल्या क्रिकेट प्रवासाला पूर्णविराम देण्याचा निर्णय जाहीर केला. त्याच्या या घोषणेनंतर क्रिकेट विश्वातून विविध प्रतिक्रिया उमटत आहेत.भरतने आपल्या संदेशात भारतीय क्रिकेट नियामक मंडळ आंध्र क्रिकेट असोसिएशन आणि आपल्या कुटुंबाचे आभार मानले. त्याचबरोबर त्याने माजी कर्णधार विराट कोहली, रोहित शर्मा आणि माजी मुख्य प्रशिक्षक राहुल द्रविड यांचे विशेष आभार मानले असून त्यांच्या मार्गदर्शनामुळे करिअर घडल्याचे सांगितले.

 

 

 

दीर्घकाळ देशांतर्गत क्रिकेटमध्ये सातत्यपूर्ण कामगिरी केल्यानंतर के. एस. भरतला भारतीय कसोटी संघात स्थान मिळाले होते. 2023 मध्ये ऑस्ट्रेलियाविरुद्ध बॉर्डर-गावस्कर ट्रॉफीदरम्यान त्याने कसोटी पदार्पण केले. ऋषभ पंतच्या अनुपस्थितीत त्याला यष्टीरक्षक म्हणून संधी मिळाली होती. त्याने भारतासाठी एकूण 7 कसोटी सामने खेळले असून 221 धावा केल्या आहेत. त्याचा शेवटचा कसोटी सामना 2024 मध्ये इंग्लंडविरुद्ध विशाखापट्टणम येथे झाला होता.

 

आंतरराष्ट्रीय स्तरावर संधी मर्यादित मिळाल्या असल्या तरी देशांतर्गत क्रिकेटमध्ये भरतने आंध्र प्रदेशकडून उत्कृष्ट कामगिरी केली आहे. यष्टीरक्षक आणि फलंदाज म्हणून त्याची सातत्यपूर्ण कामगिरी निवडकर्त्यांचे लक्ष वेधून घेणारी ठरली होती.इंडियन प्रीमियर लीगमध्येही (IPL) त्याने रॉयल चॅलेंजर्स बंगळुरू आणि दिल्ली कॅपिटल्स संघांकडून खेळताना आपली छाप पाडली. काही मोजक्या सामन्यांमध्ये त्याने महत्त्वपूर्ण धावा केल्या आणि आक्रमक फलंदाजीने लक्ष वेधले. आंतरराष्ट्रीय क्रिकेटला अल्पावधीतच अलविदा केल्यानंतरही के. एस. भरतचे देशांतर्गत क्रिकेटमधील योगदान आणि भारतीय क्रिकेटमधील त्याची भूमिका दीर्घकाळ स्मरणात राहणार आहे.