छत्री-रेनकोट काढा... मान्सून कधी पोहोचणार?

Pune monsoon गेल्या काही दिवसांपासून तीव्र उन्हाच्या झळा आणि वाढलेल्या उकाड्यामुळे हैराण झालेल्या पुणेकरांसाठी अखेर दिलासादायक वातावरण निर्माण झाले आहे. भारतीय हवामानशास्त्र विभागाने (IMD) दिलेल्या अंदाजानुसार नैर्ऋत्य मोसमी वारे सोमवारी पुणे शहर आणि परिसरात प्रवेश करण्याची दाट शक्यता असून, त्यामुळे मान्सूनचे आगमन प्रत्यक्षात होणार असल्याचे संकेत मिळत आहेत. या पार्श्वभूमीवर पुणे जिल्ह्यासाठी ‘यलो अलर्ट’ जारी करण्यात आला आहे.

 

 

हवामान तज्ज्ञांच्या माहितीनुसार, मोसमी वाऱ्यांची उत्तरेकडील सीमा सध्या देवगड परिसरातून जात आहे आणि वाऱ्यांचा प्रवास मंदावला असला तरी पुढील काही तासांत ते पुण्यात दाखल होतील. मंगळवारी हेच वारे मुंबईपर्यंत पोहोचण्याचा अंदाज वर्तवण्यात आला आहे. संपूर्ण महाराष्ट्र व्यापण्यासाठी अजून काही दिवसांचा कालावधी लागू शकतो, मात्र पुण्यात पावसाच्या सरींची सुरुवात होण्याची शक्यता वाढली आहे.आज दिवसभर पुणे शहरात ढगाळ वातावरणासह विजांच्या कडकडाटात हलक्या ते मध्यम स्वरूपाच्या पावसाच्या सरी कोसळण्याचा अंदाज आहे. दुपारनंतर सोसाट्याचे वारे आणि वादळी पावसाची शक्यता हवामान विभागाने व्यक्त केली आहे. मात्र, रात्रीच्या वेळी उकाडा पूर्णपणे कमी होण्याची शक्यता नसून किमान तापमान २६ ते ३२ अंश सेल्सिअस दरम्यान राहण्याचा अंदाज आहे.

इतर जिल्ह्यांमध्येही पावसाचा प्रभाव Pune monsoon दिसून येण्याची शक्यता आहे. सातारा जिल्ह्यासाठी मध्यम ते मुसळधार पावसाचा ‘यलो अलर्ट’ देण्यात आला आहे. तर पुणे, सांगली, सोलापूर आणि कोल्हापूर परिसरात विजांच्या कडकडाटासह हलक्या ते तुरळक स्वरूपाच्या पावसाची शक्यता वर्तवण्यात आली आहे. कोकण किनारपट्टी भागात ८ ते १० जून दरम्यान मुसळधार पावसाचा इशाराही हवामान विभागाने दिला आहे.मान्सूनच्या आगमनामुळे उष्णतेपासून दिलासा मिळणार असला तरी पुढील काही दिवस हवामानात चढ-उतार राहण्याची शक्यता असल्याने नागरिकांनी घराबाहेर पडताना काळजी घेण्याचे, तसेच छत्री किंवा रेनकोट सोबत बाळगण्याचे आवाहन करण्यात आले आहे.