फुटबॉल महाकुंभापूर्वी इंग्लंडच्या बेस कॅम्पजवळ गोळीबार

Shooting near England's base camp फिफा विश्वचषक २०२६ स्पर्धेच्या पार्श्वभूमीवर अमेरिकेतील कॅन्सस सिटी येथे घडलेल्या गोळीबाराच्या घटनेने खळबळ उडाली आहे. इंग्लंड संघाच्या नियोजित बेस कॅम्पपासून अल्प अंतरावर झालेल्या या गोळीबारात नऊ जण जखमी झाले असून, या घटनेमुळे सुरक्षा व्यवस्थेबाबत नव्याने चर्चा सुरू झाली आहे.स्थानिक पोलिसांनी दिलेल्या माहितीनुसार, शनिवारी पहाटे कॅन्सस सिटीतील एका भागात अचानक गोळीबार झाला. गोळीबाराचा आवाज ऐकताच पोलिस आणि आपत्कालीन पथके तातडीने घटनास्थळी दाखल झाली. परिसरात निर्माण झालेल्या गोंधळामुळे आणि नागरिकांमध्ये झालेल्या चेंगराचेंगरीत अनेक जण जखमी झाले. जखमींना त्वरित जवळच्या रुग्णालयात दाखल करण्यात आले असून सर्वांची प्रकृती स्थिर असल्याचे सांगण्यात आले आहे.

 

 

 

विशेष म्हणजे, ज्या भागात ही घटना घडली त्या ठिकाणाजवळच फिफा विश्वचषकादरम्यान इंग्लंड संघाचा मुक्काम असणार आहे. मात्र, घटना घडली तेव्हा इंग्लंडचा संघ कॅन्सस सिटीमध्ये नव्हता. संघ सध्या सराव आणि तयारीसाठी फ्लोरिडामध्ये असून काही दिवसांत तो कॅन्सस सिटीत दाखल होणार आहे.घटनेनंतर पोलिसांनी परिसरात सुरक्षा वाढवली असून तपास सुरू केला आहे. गोळीबारामागील कारण अद्याप स्पष्ट झालेले नाही. संशयितांचा शोध सुरू असून परिसरात अतिरिक्त पोलीस बंदोबस्त तैनात करण्यात आला आहे. दरम्यान, इंग्लंडचा संघ विश्वचषकाच्या तयारीत व्यस्त असून सराव सामन्यांमधून अंतिम संघरचना आणि रणनीती निश्चित करण्यावर भर देत आहे. मात्र, कॅन्सस सिटीतील या घटनेमुळे आगामी स्पर्धेच्या सुरक्षेविषयी चिंता व्यक्त केली जात आहे. जगभरातील फुटबॉलप्रेमींचे लक्ष आता या प्रकरणाच्या तपासाकडे लागले आहे.