मुंबईत बनावट स्कॉच रॅकेटचा पर्दाफाश

Fake Scotch racket busted in Mumbai राज्य उत्पादन शुल्क विभागाने मुंबईत बनावट मद्यनिर्मिती करणाऱ्या टोळीविरोधात मोठी कारवाई करत लाखो रुपयांचा अवैध साठा जप्त केला आहे. या कारवाईमुळे नामांकित ब्रँडच्या नावाखाली बनावट मद्य विक्री करणारे रॅकेट उघडकीस आले असून मद्यव्यवसायातील गैरप्रकारांवर पुन्हा एकदा प्रकाश पडला आहे. गुप्त माहितीच्या आधारे उत्पादन शुल्क विभागाच्या पथकाने मुंबई उपनगरातील विविध ठिकाणी विशेष मोहीम राबवली. सुरुवातीला संशयास्पद वाहनाची तपासणी करण्यात आली. तपासादरम्यान वाहनातून मोठ्या प्रमाणात बनावट मद्याच्या बाटल्या वाहतूक केल्या जात असल्याचे आढळून आले. त्यानंतर चौकशीचा धागा पकडत अधिकाऱ्यांनी इतर ठिकाणी छापे टाकले.

 

 

 

या छाप्यांमध्ये बनावट स्कॉच मद्य, रिकाम्या बाटल्या, प्रसिद्ध ब्रँडची बनावट झाकणे, पॅकिंग साहित्य तसेच बाटल्या सीलबंद करण्यासाठी वापरण्यात येणारी साधने जप्त करण्यात आली. याशिवाय वाहतुकीसाठी वापरलेले वाहनही ताब्यात घेण्यात आले. जप्त करण्यात आलेल्या सर्व साहित्याची किंमत सुमारे १९ लाख रुपयांपेक्षा अधिक असल्याचे अधिकाऱ्यांनी सांगितले.या प्रकरणी तिघांविरुद्ध महाराष्ट्र दारूबंदी कायद्यांतर्गत गुन्हे दाखल करण्यात आले असून त्यांना अटक करण्यात आली आहे. बनावट मद्यनिर्मिती आणि वितरणाचे जाळे आणखी किती मोठे आहे, याचा शोध घेण्यासाठी तपास सुरू आहे. दरम्यान, अवैध मद्यनिर्मिती, साठवणूक किंवा विक्रीबाबत माहिती असल्यास नागरिकांनी ती राज्य उत्पादन शुल्क विभागाला कळवावी, असे आवाहन विभागाकडून करण्यात आले आहे. अशा प्रकारच्या बेकायदेशीर व्यवसायांवर कठोर कारवाई सुरूच राहणार असल्याचा इशाराही अधिकाऱ्यांनी दिला आहे.