कोरोना अजून संपलेला नाही! आंध्र प्रदेशात रुग्णाचा मृत्यू

COVID-19 patient dies in Andhra Pradesh आंध्र प्रदेशातील कडपा जिल्ह्यात कोरोना संसर्गामुळे एका ४६ वर्षीय व्यक्तीचा मृत्यू झाल्याची माहिती जिल्हा वैद्यकीय व आरोग्य अधिकारी डॉ. रवी बाबू यांनी दिली आहे. चार दिवस उपचार सुरू असूनही प्रकृतीत सुधारणा न झाल्याने संबंधित रुग्णाचा मृत्यू झाला. या घटनेनंतर आरोग्य विभागाने खबरदारीच्या उपाययोजना सुरू केल्या आहेत. मसापेटा परिसरातील हा रुग्ण मद्यपानाचे व्यसन असलेला होता. श्वास घेण्यास तीव्र त्रास आणि सतत खोकला होत असल्याने त्याला रुग्णालयात दाखल करण्यात आले होते. तपासणीत दोन्ही फुफ्फुसे गंभीररीत्या बाधित झाल्याचे आणि न्यूमोनिया झाल्याचे एक्स-रेमध्ये स्पष्ट झाले.

 

 

 

सुरुवातीला डॉक्टरांनी रुग्णावर उच्च मात्रेतील प्रतिजैविक औषधांनी उपचार सुरू केले. मात्र, चार दिवसांच्या उपचारानंतरही प्रकृतीत कोणतीही सुधारणा झाली नाही. त्यानंतर कोरोना संसर्गाची शक्यता लक्षात घेऊन पुढील तपासण्या करण्यात आल्या. छातीच्या सीटी स्कॅनमध्ये रुग्णाला कोरोना संसर्ग झाल्याची पुष्टी झाली. रुग्णाच्या मृत्यूनंतर आरोग्य विभागाने परिसरात स्वच्छता आणि निर्जंतुकीकरणाची मोहीम हाती घेतली आहे. तसेच संसर्गाचा प्रसार रोखण्यासाठी मृत व्यक्तीच्या निकट संपर्कातील आणि त्यांच्या संपर्कात आलेल्या इतर व्यक्तींची ओळख पटवून आवश्यक वैद्यकीय तपासणी व देखरेख सुरू करण्यात आली आहे.