स्मृतीने इतिहासालाच गवसणी घातली!

smriti-mandhana : भारतीय महिला संघ सध्या लॉर्ड्सवर इंग्लंडविरुद्ध एकमेव कसोटी सामना खेळत आहे. या सामन्यात स्मृती मंधानाने इतिहास रचला आहे. हा मंधानाच्या कारकिर्दीतील ३०० वा आंतरराष्ट्रीय सामना आहे. यासह, ती ३०० आंतरराष्ट्रीय सामने खेळणारी जगातील सर्वात तरुण महिला खेळाडू ठरली आहे. या कामगिरीवरून हे दिसून येते की, तिने अगदी लहान वयातच भारतीय संघाची जबाबदारी स्वीकारली आणि आपल्या उत्कृष्ट खेळाने संघाला सातत्याने पुढे नेले आहे.

 

 

 

 

 

 

स्मृती मंधाना ही ३०० किंवा त्याहून अधिक आंतरराष्ट्रीय सामने खेळणारी जगातील १२ वी महिला खेळाडू आहे. केवळ भारतीय संघाचा विचार केल्यास, ३०० आंतरराष्ट्रीय सामने खेळणारी ती तिसरी भारतीय खेळाडू आहे. तिच्या आधी केवळ दोन महान भारतीय खेळाडूंनी हा पराक्रम केला आहे. कर्णधार हरमनप्रीत कौर ३७४ सामन्यांसह अव्वल स्थानी असून, त्यानंतर दिग्गज फलंदाज मिताली राज आहे. मितालीने ३३३ सामने खेळले आहेत. आता स्मृती मंधानानेही आपला ३०० वा सामना पूर्ण करून दिग्गज खेळाडूंच्या या एलिट यादीत स्थान मिळवले आहे.

 

 

हा सामना केवळ स्मृती मंधानासाठीच नव्हे, तर संपूर्ण महिला क्रिकेट जगतासाठी एक ऐतिहासिक क्षण आहे. इंग्लंडमधील १९ वेगवेगळ्या मैदानांवर एकूण ५५ महिला कसोटी सामने खेळले गेले आहेत, परंतु क्रिकेटची मक्का म्हणून ओळखल्या जाणाऱ्या प्रसिद्ध लॉर्ड्सवर प्रथमच महिलांचा कसोटी सामना खेळला जात आहे. महिलांच्या कसोटी सामन्यांचा इतिहास पाहता, इंग्लंडमध्ये सर्वाधिक सामने वॉर्सेस्टरमधील काउंटी ग्राऊंडवर नऊ आणि ओव्हलवर सहा खेळले गेले आहेत.

 

 

इंग्लंडच्या भूमीवर भारतीय महिला संघाची कसोटी कामगिरी प्रभावी आहे. भारतीय महिला संघ आता इंग्लंडमध्ये आपला १० वा कसोटी सामना खेळत आहे. यापूर्वीच्या नऊ सामन्यांपैकी भारतीय संघाने दोन सामने जिंकले आहेत, तर उर्वरित सात सामने अनिर्णित राहिले आहेत. सर्वात मोठी आणि अभिमानाची गोष्ट म्हणजे भारतीय महिला संघाने आजपर्यंत इंग्लंडमध्ये एकही कसोटी सामना गमावलेला नाही.