टोरंटोच्या उत्सवात मृत्यूचा थैमान

deadly rampage at toronto festival कॅनडातील टोरंटो शहरात सुरू असलेल्या 'साल्सा ऑन सेंट क्लेअर' या स्ट्रीट फेस्टिव्हलदरम्यान झालेल्या गोळीबारामुळे मोठी खळबळ उडाली. या घटनेत दोन जणांचा मृत्यू झाला असून चार जण जखमी झाले आहेत. गोळीबारानंतर परिसरात भीतीचे वातावरण निर्माण झाले असून घटनास्थळी मोठा पोलिस बंदोबस्त तैनात करण्यात आला आहे.

 

 

टोरंटो पोलिसांनी दिलेल्या माहितीनुसार, सेंट क्लेअर अव्हेन्यू वेस्ट आणि आर्लिंग्टन अव्हेन्यू परिसरात गोळीबाराची घटना घडली. पोलिस घटनास्थळी पोहोचले तेव्हा सहा जणांना गोळ्या लागलेल्या अवस्थेत आढळले. सुरुवातीला सक्रिय हल्लेखोराचा इशारा देण्यात आला होता, मात्र नंतर परिस्थिती नियंत्रणात असल्याचे पोलिसांनी स्पष्ट केले. तरीही या प्रकरणातील संशयित अद्याप फरार असून त्याचा शोध सुरू आहे.

 

गोळीबारानंतर नागरिकांना घटनास्थळापासून दूर राहण्याचे आवाहन करण्यात आले. या घटनेनंतर महोत्सव परिसरात सुरक्षा व्यवस्था अधिक कडक करण्यात आली असून तपास यंत्रणांनी परिसर सील करून पुरावे गोळा करण्यास सुरुवात केली आहे. घटनेचे प्रत्यक्षदर्शी असलेल्या पॅटसी गुटेरेझ यांनी सांगितले की, त्या स्टॉलवर ग्राहकांना वस्तू देत असताना अचानक लोकांची धावपळ सुरू झाली. सर्वत्र भीतीचे वातावरण निर्माण झाल्याने त्यांनी विक्री थांबवली. अशा सांस्कृतिक कार्यक्रमांमध्ये हिंसाचार होणे अत्यंत दुर्दैवी असल्याची भावना त्यांनी व्यक्त केली.

 

व्हॅलेरी रॉड्रिग्ज यांनी सांगितले की, त्या एका रेस्टॉरंटजवळ बसल्या असताना अचानक लोक किंचाळत पळू लागले. अनेकांनी आम्हाला तातडीने जमिनीवर झोपण्यास सांगितले. नेमके काय घडत आहे, याची कल्पना नसल्याने सर्वजण प्रचंड घाबरले होते, असे त्यांनी सांगितले. ओंटारियोचे प्रीमियर डग फोर्ड यांनी या घटनेबद्दल तीव्र दुःख व्यक्त केले आहे. सोशल मीडियावरील संदेशात त्यांनी 'साल्सा ऑन सेंट क्लेअर' महोत्सवात झालेला हा निरर्थक हिंसाचार अत्यंत धक्कादायक असल्याचे म्हटले असून, मृतांच्या कुटुंबीयांप्रती आणि जखमींसह या घटनेचा फटका बसलेल्या सर्वांप्रती सहवेदना व्यक्त केल्या आहेत.

 

'साल्सा ऑन सेंट क्लेअर' हा लॅटिनो संस्कृतीवर आधारित लोकप्रिय महोत्सव असून त्यामध्ये थेट लॅटिन संगीत, नृत्य, खाद्यपदार्थ आणि विविध सांस्कृतिक कार्यक्रमांचे आयोजन केले जाते. यंदा या महोत्सवाचे २२ वे वर्ष होते. टोरंटोच्या गजबजलेल्या व्यापारी भागात होणारा हा महोत्सव दरवर्षी हजारो नागरिकांना आकर्षित करतो. कॅनडातील सर्वात मोठे शहर असलेल्या टोरंटोमध्ये सार्वजनिक ठिकाणी अशा प्रकारचे जीवघेणे गोळीबार अत्यंत दुर्मिळ मानले जात असल्याने या घटनेने संपूर्ण शहर हादरले आहे.