केदारनाथ यात्रेला पावसाचा फटका

rain hits kedarnath pilgrimage उत्तराखंडमधील रुद्रप्रयाग येथे सततच्या पावसामुळे झालेल्या भूस्खलनामुळे केदारनाथ यात्रेत व्यत्यय आला आहे. सोनप्रयाग येथील मुनकटियामध्ये केदारनाथ महामार्गावर झालेल्या भूस्खलनामुळे रस्त्यावर डोंगराचा मोठा मलबा साचला आहे. तथापि, मलबा हटवण्याचे काम सुरू झाले आहे.

 

 

वाहतूक लवकर पुन्हा सुरू व्हावी यासाठी, बाधित मार्गावरील मलबा हटवण्यासाठी जेसीबीसह अर्थ-मूव्हिंग मशिन्स तैनात करण्यात आल्या आहेत. जिल्हा प्रशासन जिल्हा आपत्ती नियंत्रण कक्षामार्फत परिस्थितीवर लक्ष ठेवून आहे. अधिकाऱ्यांना संवेदनशील ठिकाणी 24 तास पाळत ठेवण्याचे निर्देश देण्यात आले आहेत.

 

जिल्हा आपत्ती व्यवस्थापन अधिकारी (डीडीएमओ) नंदन सिंह राजवार यांनी सांगितले की, भूस्खलनामुळे रस्ता विस्कळीत झाला असला तरी, केदारनाथ यात्रा सुरळीतपणे सुरू आहे. बाधित झालेला मार्ग लवकरच पुन्हा सुरू केला जाईल, असा विश्वास त्यांनी व्यक्त केला.

 

एएनआय या वृत्तसंस्थेनुसार, डीएमएमओ म्हणाले, ‘केदारनाथ यात्रा सुरळीतपणे सुरू आहे. गौरीकुंडजवळील मुनकटिया येथे रस्ता अडवला असून, तिथे एक जेसीबी मशीन काम करत आहे. तो मार्गही लवकरच पुन्हा सुरू केला जाईल. आमचे क्षेत्रीय अधिकारी आणि इतर कर्मचारी कोणत्याही आपत्कालीन परिस्थितीला त्वरित प्रतिसाद देण्यासाठी यात्रा मार्गावर सतत सतर्क आहेत. जिल्हाधिकाऱ्यांनीही आपापल्या यात्रा क्षेत्रातील आणि ज्यांच्यावर जबाबदारी सोपवण्यात आली आहे, अशा सर्वांना सतर्क राहण्याचे निर्देश दिले आहेत. प्रशासनाने यात्रेकरूंना आणि स्थानिक रहिवाशांना मुसळधार पावसात सुरक्षित ठिकाणी राहण्याचा सल्ला दिला आहे.

 

दरम्यान, टिहरी गढवाल जिल्ह्यात, मसुरी मोर (केम्प्टी) जवळ भूस्खलन झाल्यामुळे नैनबाग रस्त्यावरील वाहतूक तात्पुरती थांबवण्यात आली आहे. टिहरी पोलिसांच्या माहितीनुसार, लवकरात लवकर वाहतूक पूर्ववत करण्यासाठी जेसीबी मशीन सेवेत दाखल करण्यात आल्या असून, ढिगारा हटवण्याचे काम युद्धपातळीवर सुरू आहे.