फिरायला नेलं, फोटो काढले अन्...

murder case राजस्थानमधील सिरोही जिल्ह्यात एका धक्कादायक हत्याकांडाचा पोलिसांनी छडा लावला आहे. पत्नीचा मृत्यू नैसर्गिक असल्याचे भासवून पोलिसांची आणि कुटुंबीयांची दिशाभूल करणाऱ्या पतीला पोलिसांनी अटक केली आहे. आरोपीने पत्नीचा खून केल्यानंतर तिला हृदयविकाराचा झटका आल्याचा बनाव रचल्याचे तपासात समोर आले आहे.

 

 

बारलूट पोलीस ठाण्याच्या हद्दीतील जावल येथे ही घटना घडली. मृत पूनम कंवर यांच्या कुटुंबीयांनी संशय व्यक्त केल्यानंतर पोलिसांनी तपास सुरू केला. सुरुवातीला आरोपी पतीने वेगवेगळी माहिती देत पोलिसांची दिशाभूल करण्याचा प्रयत्न केला. मात्र सीसीटीव्ही फुटेज, तांत्रिक पुरावे आणि इतर तपासाच्या आधारे पोलिसांनी संपूर्ण कट उघडकीस आणला.

 

पोलिसांच्या माहितीनुसार, जावल येथील रहिवासी नरपत सिंग यांचा मुलगा गजेंद्र सिंग याने पत्नीच्या हत्येचा कट सुमारे १० दिवस आधीच आखला होता. पत्नीच्या मृत्यूला नैसर्गिक स्वरूप देण्यासाठी त्याने आधी तिला कोईम्बतूरला नेले. त्यानंतर अहमदाबाद आणि उदयपूर येथेही फिरवले. सर्व काही सुरळीत असल्याचा आभास निर्माण करण्यासाठी त्याने पत्नीला उदयपूर येथील सेलिब्रेशन मॉलमध्ये खरेदीसाठी नेले आणि तिच्यासोबत फोटोही काढले. या संपूर्ण योजनेनंतर आरोपीने उदयपूरहून जावलला जाण्यासाठी टॅक्सी केली. रात्रीच्या प्रवासादरम्यान त्याच्यासोबत पत्नी आणि त्यांची ३ वर्षांची मुलगी होती. प्रवासात मुलगी झोपलेली असताना आरोपीने पत्नीचा गळा दाबून खून केल्याचा आरोप पोलिसांनी केला आहे. त्यानंतर तो मृतदेह घेऊन घरी आला आणि वाटेत हृदयविकाराच्या झटक्याने पत्नीचा मृत्यू झाल्याचे कुटुंबीयांना सांगितले.

 

या प्रकरणाचा खुलासा करताना पोलीस अधीक्षक पुष्पेंद्र सिंग राठोड यांनी सांगितले की, आरोपीने हत्या लपवण्यासाठी संपूर्ण योजना आखली होती. मात्र तपासादरम्यान मिळालेल्या पुराव्यांमधून सत्य समोर आले. मृताच्या भावानेही मृत्यूबाबत संशय व्यक्त करत तक्रार दाखल केली होती. त्यानंतर बारलूट पोलिसांनी गुन्हा नोंदवून तपासाची जबाबदारी सर्कल ऑफिसर मुकेश चौधरी यांच्याकडे सोपवली.

 

तपासादरम्यान एसडीएम आणि पोलीस उपअधीक्षक यांच्या उपस्थितीत पुराव्यांची तपासणी करण्यात आली. पोलिसांनी घटनाक्रमातील प्रत्येक कडी जोडत तांत्रिक पुरावे गोळा केले. चौकशीत आरोपीसमोर पुरावे ठेवण्यात आल्यानंतर त्याने पत्नीच्या हत्येची कबुली दिल्याचे पोलिसांनी सांगितले. दरम्यान, या प्रकरणात टॅक्सी चालकाची भूमिकाही संशयाच्या भोवऱ्यात आली आहे. पोलिसांकडून त्याचा शोध सुरू असून, हत्येच्या कटात त्याचा सहभाग आढळल्यास त्याच्यावरही कारवाई केली जाणार आहे. हा गुन्हा ११ जुलै रोजी बारलूट पोलीस ठाण्यात दाखल करण्यात आला होता. त्यानंतर सखोल तपास केल्यानंतर पोलीस अधीक्षक पुष्पेंद्र सिंह राठोड यांनी १४ जुलै रोजी पत्रकार परिषद घेऊन या खळबळजनक प्रकरणाची माहिती दिली. या प्रकरणातील इतर पैलूंवर अद्याप तपास सुरू असल्याचे पोलिसांनी स्पष्ट केले आहे.